Усё найлепшае ў жыцці чалавека — ад матулі. Гэта яна песціла, лашчыла нас, спявала калыханкі, абараняла ад бяды, давала мудрыя парады. У дзяцінстве матуліны словы прымаеш і запамінаеш, але іх глыбінны сэнс, іх стваральную сілу пачынаеш разумець значна пазней, калі становішся дарослай, калі нараджаюцца ўласныя дзеці. Цяпло таго нязгаснага агеньчыка, які ў тваім сэрцы запаліла маці, ты перадаеш ім.
Напярэдадні Дня маці карэспандэнтка газеты “Перамога” пацікавілася ў жанчын нашага раёна, якую жыццёвую мудрасць перадалі ім мамы, чаму навучылі.
Таццяна Нікіпорчык, дырэктар Цэнтра сацыяльнага абслугоўвання насельніцтва Дзятлаўскага раёна:
— Светлая памяць аб маёй мамачцы, Тамары Рыгораўне, жыве ў маім сэрцы. З любоўю я адносілася да яе ў гады жыцця, не забываю яе і цяпер.
Мама навучыла працаваць, не скардзіцца і не прасіць штораз дапамогі, а ставіць мэты і дасягаць іх. Навучыла дарыць людзям дабрыню і клопат, не патрабуючы нічога ўзамен. Марыла, каб выраслі мы годнымі людзьмі і грамадзянамі сваёй краіны.
Памятаць і шанаваць бацькоў — абавязак дзяцей, нават калі яны даўно “вылецелі з роднага гнязда”.
І. КАЎКЕЛЬ
