Крымінальная хроніка. Здарэнні мінулага тыдня

З 4 па 10 ліпеня 2022 года ў аператыўна-дзяжурную службу АУС Дзятлаўскага райвыканкама паступіла 65 паведамленняў, 6 з якіх утрымлівалі звесткі аб прыкметах учыненых злачынстваў, 20 – аб адміністрацыйных правапарушэннях, 39 – аб іншых здарэннях.

Да адміністрацыйнай адказнасці былі прыцягнуты 28 правапарушальнікаў, узбуджана 3 крымінальныя справы.

Падсаладзіў жыццё

Раней не судзімы беспрацоўны жыхар адной з вёсак нашага раёна вырашыў не чакаць аўтамагазіна, а знайсці ўсе неабходныя прадукты на чужой дачы. Злодзей разбіў аконнае шкло і забраў з сабой бутэльку гарэлкі, спіртаўтрымліваючую вадкасць і шакаладную пасту на агульную суму 25 рублёў. Узбуджана крымінальная справа за крадзеж.

Кветачка не для агарода

Барацьбу з наркаўтрымліваючай расліннасцю ў рамках прафілактычнай спецыяльнай праграмы “Мак” прадаўжаюць праваахоўнікі. За мінулы тыдзень яны знішчылі каля паўкілаграма шкоднага зелля. Па-ранейшаму “букеты” алійнага маку знаходзяць на прысядзібных участках жыхароў раёна – у час мінулага рэйда папярэджаны 3 чалавекі.

Дыхніце ў трубачку

Нецвярозымі на працоўным месцы на мінулым тыдні засталі работнікаў двух гаспадарак раёна. У жывёлавода выявілі 2 праміле алкаголю, у аператара машыннага даення – 0,5. На абодвух аматараў алкагольных напояў складзены адміністрацыйныя пратаколы.

Аляксандр БІЛЬ,
начальнік АУС Дзятлаўскага райвыканкама

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga