Канікулы з карысцю

У рамках школы юнага журналіста “Медыя-STARt” кафедра журналістыкі арганізавала прафарыентацыённы тур-практыкум для навучэнцаў 11 класа Казлоўшчынскай сярэдняй школы.

Знаёмства з Гродзенскім дзяржаўным універсітэтам імя Янкі Купалы (а многія вучні ўпершыню патрапілі ў гэты універсітэт) уключала экскурсію і майстар-клас у вучэбна-навукова-вытворчым аб’яднанні “Студэнцкі медыяцэнтр”. Пад кіраўніцтвам начальніка медыяцэнтра Кіры Мар’янаўны Блудавай-Гой студэнты спецыяльнасцяў “Журналістыка” і “Інфармацыя і камунікацыя” пазнаёмілі школьнікаў з арганізацыяй работы ў вучэбнай радыёстудыі і тэлестудыі.

За час, праведзены ва ўніверсітэце, навучэнцы не толькі атрымалі шмат карыснай інфармацыі аб прафесіі журналіста, але і паспелі паспрабаваць свае сілы ў журналісцкай працы. Адзінаццацікласнікам расказалі аб рабоце медыяцэнтра, паказалі фрагменты студэнцкіх відэапраектаў, далі магчымасць паспрабавць сябе ў якасці вядучага праграмы, герояў інтэрв’ю, аператараў і карэспандэнтаў. Госці медыяцэнтра зазірнулі ў аб’ектыў відэакамеры, пазіравалі фатографам, вучыліся рэжысіраваць. Вынікам сустрэчы стала памятнае фота і шматлікія сэлфі гасцей.

 

Іна Мінчук падзялілася з абітурыентамі сакрэтамі паспяховага паступлення на спецыяльнасці “Журналістыка” і “Інфармацыя і камунікацыя” і расказалала пра магчымасці кафедры журналістыкі, факультэта гісторыі, камунікацыі і турызму.

Удзельнікі сустрэчы вельмі ўдзячны загадчыцы кафедры журналістыкі Іне Іванаўне Мінчук за праведзенае мерапрыемства.

Святаслаў БУЯК,
класны кіраўнік 11 класа Казлоўшчынскай сярэдняй школы