Хваляванне ёсць – прычыны няма

Грамадскае меркаванне – жывы арганізм, які пастаянна “харчуецца” навінамі з розных крыніц, мае свой настрой, перавагі і перасцярогі.

На жаль, усе мы часцей людзі ўражлівыя, хвалявацца “за кампанію” закладзена ў нашай прыродзе.

І калі на фоне ўсеагульных трывог, якіх ва ўсіх цяпер хапае, адзін з тэлеграм-каналаў піша, што ў магазінах пустыя паліцы і хутка ўжо будзем галадаць, хуценька дастаём грашовую “заначку” і бяжым па мех цукру (не менш!).

Але народная мудрасць не згодна з сучаснымі інфармацыйнымі тэхналогіямі. “Давярай, але правярай”, – падказвае яна. Таму наспеў час правесці невялікі маніторынг харчовых магазінаў райцэнтра.

Наведаўшы магазіны “Санта-Кэш”, “Родны Кут”, “Дабраном “Копеечка”, упэўніваюся: дэфіцыту няма. На паліцах і ў палетах дастаткова крупаў, макаронаў, цукру, солі і мукі, хоць апошнюю актыўна набывалі дзятлаўчане на працягу выхадных (магчыма, людзі рыхтуюцца масава выпякаць велікодныя кулічы). У адным з магазінаў сустракаю ранніх кліентаў, якія таксама прыйшлі па муку, набываюць некалькі кілаграмаў. На пытанне, навошта столькі, адказ просты:

– Бо суседка брала ў запас, дык вось і мы вырашылі, што трэба.

Загадчыца магазіна “Родны кут” Таісія Трайнель запэўнівае, што перабояў з пастаўкамі харчовай прадукцыі ў магазіне няма:

– Цукар у асноўным са Скідзеля, мука розная, у тым ліку лідская, соль з Мазыра пераважна возім. Калі раней рабілі заяўку раз на два тыдні, цяпер, з павышэннем попыту, часцей. Запас крупаў і макаронаў у нас вялікі. Працуем у звычайным рэжыме, з ранейшым асартыментам тавару.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga