“Гуляй, Бульбаш!” і Белдзяржфілармонія – зноў у Дзятлаве (+відэа)

На працягу 33 гадоў у раёнах, якія пацярпелі ад катастрофы на Чарнобыльскай АЭС, праходзіць Міжнародная сацыяльна-творчая праграма “У будучыню – з надзеяй”, якая сёлета таксама прымеркавана да 75-годдзя вызвалення Беларусі.

Арганізатарамі праекта з’яўляюцца Дэпартамент па ліквідацыі наступстваў катастрофы на Чарнобыльскай АЭС Міністэрства па надзвычайных сітуацыях Рэспублікі Беларусь, Міністэрства культуры Рэспублікі Беларусь, Беларускі Фонд міру, Беларускі саюз музычных дзеячаў. Мастацкі кіраўнік праграмы – народны артыст Беларусі кампазітар Эдуард Ханок. Праграма ўжо прайшла ў 26-ці раёнах, якія пацярпелі ад аварыі на Чарнобыльскай АЭС (і не толькі ў нашай краіне, але і ў Расіі і Украіне). Дзявятага красавіка яна прайшла ў Дзятлаве.

 

На пачатку канцэрта ў Дзятлаўскім цэнтры культуры і народнай творчасці выступілі юныя таленты нашага раёна – цымбалістка Анастасія Салата, дуэт баяністак з дзіцячай школы мастацтваў, вакальная група “Арэал” СШ № 3, гімнастка на палотнах Віялета Ёрш і акрабатычны дуэт на крэслах з цыркавой студыі “Марсі”. Некаторых з іх запрасілі на фінал праграмы “У будучыню – з надзеяй”, які адбудзецца ў маі ў Мінску. Усе дзеці атрымалі падарункі ад арганізатараў праекта.

Цудоўным прафесійным выкананнем песняў, танцаў, ігрой на музычных інструментах парадавалі дзятлаўчан артысты Белдзяржфілармоніі і ансамбль “Гуляй, Бульбаш!”.

Святлана ГРЫШЫНА
Вольга ЮШКЕВІЧ