ГрадусПлюс. Што за перамога без вайны, або Гісторыя новай дарожкі

Нездарма сёлета блогераў Беларусі прымалі на рэспубліканскім узроўні. Блогерства становіцца не проста хобі і забавай, а сур’ёзнай справай і такой жа адказнасцю. За ўсё, што мы кажам публічна ў сацыяльных сетках, павінны быць гатовы несці справаздачу, асабліва калі гэта робіцца на вялікую аўдыторыю.

Многія жыхары Дзятлаўшчыны (і не толькі яны!) бачылі ў сацсетцы TikTok ролік пра пешаходную дарожку ў мікрараёне вуліцы Савецкай і нават актыўна каменціравалі яго, упіраючы на перамогу народа. Хто каго перамагаў, не вельмі зразумела: дарожак на тым участку больш чым дастаткова, афіцыйных запытаў наконт яшчэ адной ад людзей не паступала, а відэа было знята, калі работнікі жылкамунгаса ўжо пачалі планавыя работы. Заўважым, што больш за ўсіх дадзенай палемікай здзіўлены дырэктар РУП ЖКГ Васіль Пяцюк.

– Не вельмі зразумела, хто каго перамагаў, бо мы ні з кім не ваявалі, – жартуе ён. – Добраўпарадкаванне горада Дзятлава і раёна вядзецца планава і паслядоўна, а пракладванне новых пешаходных дарожак прадыктавана жыццём і перавагамі мясцовых жыхароў. Так, у мінулым годзе мы праклалі дадатковы шлях да магазіна “Санта-Кэш” на вуліцы Навагрудскай, цяпер рэалізавалі запланаванае на гэты год будаўніцтва па Савецкай. З’яўленне новага аб’екта тут абумоўлена яшчэ і запланаваным уладкаваннем гарадскога фантана, які ўжо гэтым летам плануецца адкрыць.

Больш падрабязны расповед пра фантан – тэма для новага артыкула, які яшчэ з’явіцца на старонках газеты “Перамога”. А пакуль, думаю,  не пакрыўлю душой, калі агучу меркаванне многіх землякоў пра сквер Дварчаніна ў Дзятлаве. Тут не адзін год было і ёсць усё для камфорту людзей – і дарожкі, і лавачкі, і прыгожыя цікавыя насаджэнні. Гэта месца створана з клопатам пра людзей: моладзь і дарослыя рады бавіць тут час, нават без непатрэбных спрэчак і гучных інфанагодаў.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga