У рэдакцыю газеты “Перамога” звярнуўся чытач з пытаннем аб вядзенні палявання ў раёне:
– Падкажыце, ці можна цяпер паляваць на лісіц і ці праўда, што іх можна здаваць платна?
На гэта пытанне даў адказ вядучы паляўніцтвазнавец Дзятлаўскай паляўнічай гаспадаркі Слонімскай міжраённай арганізацыйнай структуры Рэспубліканскага дзяржаўнага грамадскага аб’яднання “Беларускае таварыства паляўнічых і рыбаловаў” Юрый Міклаш:
– Паляванне на лісіцу можна весці круглы год пры ўмове законнага знаходжання ва ўгоддзях, бо яна адносіцца да непажаданых відаў жывёл, таксама як і янотападобны сабака, воўк, шакал, варона шэрая, сарока, чапля вялікая белая і шэрая. З лістапада мінулага года дзейнічае рашэнне аблвыканкама аб кампенсацыйных выплатах за здабычу непажаданых відаў жывёл, на аснове якога мы заключылі дагаворы з усімі сельгаспрадпрыемствамі раёна. Каб атрымаць кампенсацыю, трэба прадаставіць здабытую жывёлу на экспертызу ў ветэрынарную службу раёна, там складаецца акт у двух экзэмплярах, які замацоўваецца пячаццю і рэгіструецца ў журнале, у ім указваецца, на землях якога сельгаспрадпрыемства здабыта жывёла. На аснове акта накіроўваецца запыт у сельгаспрадпрыемства, якое будзе ажыццяўляць кампенсацыю, пералічваючы грашовыя сродкі на рахунак нашай арганізацыйнай структуры, паляўнічыя змогуць атрымаць выплату ў нас. Кампенсацыя за лісіцу, янотападобнага сабаку і шакала складае паўтары базавыя велічыні за галаву (базавая выплачваецца паляўнічаму за вылікам падаходнага падатку, 0,5 базавай – арганізацыйнай структуры), за ваўка – шэсць базавых велічыняў (чатыры – паляўнічаму, дзве – арганізацыйнай структуры).
Заўважу, што Гродзенская вобласць адзіная, дзе адстрэл непажаданых жывёл кампенсуецца фінансава. На Дзятлаўшчыне з пачатку года ўжо ўпалявана і здадзена больш за 100 лісіц, 15 янотападобных сабак, адзін воўк.
Наталля АВЯРЧУК
