У рэдакцыю газеты “Перамога” наконт добраўпарадкавання могілак вёскі Коскі звярнуўся жыхар аграгарадка Гезгалы Рыгор Смаляк.
Ён расказаў, што Коскі маланаселеныя, і галоўным ініцыятарам падтрымання парадку на мясцовым пагосце з’яўляецца вясковец Барыс Кулеш, які з землякамі хоча ўстанавіць на могілках агароджу.
Зразумела, што любая ініцыятыва, тым больш у год добраўпарадкавання, павінна знайсці падтрымку, таму разбірацца ў сітуацыі накіраваліся на месца разам з намеснікам дырэктара РУП ЖКГ Віктарам Дзедулем.
У Косках да нас далучыліся старшыня Жукоўшчынскага сельвыканкама Іван Свіб і непасрэдна сам ініцыятар Барыс Кулеш.
Варта адзначыць, што дадзеныя вясковыя могілкі хоць невялікія, але дагледжаныя, і гэта плён сумесных намаганняў мясцовага насельніцтва, сельвыканкама і камунгаса. Нават пляцоўка для смецця акуратна вычышчана.
– У Жукоўшчынскім сельскім савеце налічваецца 11 могілак, і ўсе яны два гады таму з адпаведнымі дакументамі перададзены на баланс Дзятлаўскага РУП ЖКГ, – патлумачыў Іван Свіб. – Зразумела, што сельвыканкам і жыхары сельсавета ўдзельнічаюць у справах добраўпарадкавання, у тым ліку памятных мясцін і могілак. З насельніцтвам арганізоўваем суботнікі, ажыццяўляем высечку хмызнякоў, уборку тэрыторый, сметнікаў, падтрымліваем належны парадак. Варта адзначыць, што жыхары Косак у сельвыканкам па пытаннях засмечанасці ні разу не звярталіся, у сезон трава на могілках пастаянна скошвалася, а камунгас вывозіў смецце, праблемных сітуацый не ўзнікала.
– У нашай вёсцы практычна нікога не засталося, акрамя мяне, карэннага жыхара Ігара Каско і дачніка Аляксея Кастусіка, – расказаў Барыс Кулеш. – Менавіта мы і сочым за чысцінёй і парадкам на могілках. Паколькі тут пахаваны мае бацькі, я па магчымасці запрашаю памочнікаў, калі з работамі складана справіцца самастойна. Зразумела, што па перыметры патрэбна агароджа, каб было відаць, дзе межы могілак. Яны невялікія, праз метраў пяцьдзясят – ужо жылыя дамы. Раней мы з землякамі тут выпільвалі паваленыя дрэвы і меркавалі, што някепска было б сваімі сіламі паставіць агароджу, магчыма, столік, лавачкі. Старонняй дапамогі не чакалі, бо традыцыйна складваемся грашыма самі, хто колькі можа. Плот таксама можам пабудаваць сваімі сіламі, выкарыстоўваючы драўніну з выдаленых з тэрыторыі могілак дрэваў, не хапае толькі дакументальнага дазволу, каб прыступіць да рэалізацыі нашай задумы.
– Па просьбах мясцовых жыхароў мы выехалі на могілкі ў Коскі, – дапоўніў тэму Віктар Дзедуль. – Аб’ект гэты дагледжаны, смецця тут не заўважылі, аднак ёсць жаданне людзей устанавіць агароджу. Прычым чалавек сам без фінансавых затрат з боку раёна і РУП ЖКГ бярэцца яе ўзвесці. У бліжэйшыя дні мы пакажам межы могілак, дапаможам у выдаленні дрэў, якія трапяць у гэтыя межы. Затым яны і будуць выкарыстаны як лесаматэрыял для агароджы.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#ГОД БЛАГОУСТРОЙСТВА
