Генацыд. Расследаванне не спыняецца

На Дзятлаўшчыне прадаўжаюцца інфармацыйныя сустрэчы ў працоўных калектывах, на якіх слухачоў знаёмяць з усё новымі фактамі па расследаванні генацыду беларускага народа ў гады Вялікай Айчыннай вайны.

Чарговая з іх адбылася ў ААТ “Новаяльнянскі КХП”.

Як расказала работнікам прадпрыемства начальнік аддзела ідэалагічнай работы і па справах моладзі райвыканкама Вольга Рагачова, праект ініцыіраваны Генеральнай пракуратурай Рэспублікі Беларусь для азнаямлення суайчыннікаў з новымі фактамі следства і захавання гістарычнай памяці.

Аб ходзе расследавання прысутным расказаў пракурор Дзятлаўскага раёна Віталій Юрго. Спыніўся не толькі на зверствах фашыстаў у гады ваеннага ліхалецця, але і прывёў прыклады, якія тычацца менавіта іх мясцовасці:

– Мы вывучаем архіўныя і музейныя дакументы, сустракаемся з людзьмі, якія самі былі сведкамі тых страшных падзей або чулі аб іх ад старэйшага пакалення. Літаральна некалькі хвілін таму мною разам з жыхарамі Наваельні было ўстаноўлена месца перасылачнага лагера, які размяшчаўся на тэрыторыі пасёлка. Наперадзе шмат карпатлівай работы, будзем спадзявацца, выніковай. Мяркую, вы ведаеце, што падобная страшная знаходка не першая для вашых мясцін. У 2021-2022  гадах у Наваельні працаваў асобны пошукавы 52-і батальён, які ў час раскопак падняў косныя астанкі расстраляных мірных жыхароў. Па выніках экспертызы косці належалі не менш чым 62 чалавекам ва ўзросце ад 5 да 60 гадоў. Іх перапахавалі, устанавілі памятны знак. І такіх мясцін у Беларусі тысячы.

У маі 2021 года з ініцыятывы Генпракуратуры прыняты Закон “Аб недапушчэнні рэабілітацыі нацызму”, у студзені 2022-га – Закон “Аб генацыдзе беларускага народа”, якія сталі своеасаблівым прававым бар’ерам на шляху спробаў фальсіфікацыі гістарычнай праўды і памяці, што нам даверана.

Каб не быць галаслоўнымі, Вольга Рагачова і Віталій Юрго прапанавалі прысутным прагледзець відэастужку “Армія праклятых” з дакументальнага цыкла “Без тэрміну даўнасці” аб генацыдзе мірнага насельніцтва Беларусі.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga