Гаспадарскі падыход. Пляцоўка для спартыўных перамог і сяброўства

На тэрыторыі Новаяльнянскай сярэдняй школы імя А. А. Шаўчук урачыста адкрылі новую шматфункцыянальную спартыўную пляцоўку.

Яе стварэнне стала вынікам вялікай сумеснай работы – фінансавай і іншай падтрымкі раённай улады, дапамогі спонсараў, няспынных старанняў настаўнікаў і навучэнцаў школы, якія ўклалі нямала працы ў гэты аб’ект.

Для  Новаяльнянскай сярэдняй школы імя А. А. Шаўчук дзень адкрыцця новага спартыўнага аб’екта стаў вельмі значным, бо, акрамя гэтага, у мясцовасці рэалізуецца праект «Наваельня — здаровы пасёлак». Ва ўрачыстасці  з гэтай нагоды прынялі ўдзел прадстаўнікі кіраўніцтва раёна на чале са старшынёй райвыканкама Андрэем Садоўскім, духавенства, дырэктар ААТ “Граніт-Агра” Уладзімір Лашко, старшыня Новаяльнянскага сельвыканкама Людміла Радзевіч, кіраўнік раённага цэнтра па забеспячэнні дзейнасці бюджэтных і іншых арганізацый Святлана Панасюк, навучэнцы і педагагічны калектыў школы.

Права падняць Дзяржаўны сцяг Рэспублікі Беларусь і распачаць мерапрыемства атрымалі лепшыя спартсмены навучальнай установы: Варвара Добыш – уладальнік знака “Алімпійская надзея” па нарматывах фізкультурна-аздараўленчага комплексу Рэспублікі Беларусь “Гатовы да працы і абароны” і Мацвей Іванчык – удзельнік раённай каманды па хакеі “Алмаз”, уладальнік кубка чэмпіянату “Залатая шайба-2025”.

Андрэй Садоўскі павітаў прысутных і павіншаваў са знакавай падзеяй.

– Спартыўная пляцоўка ў Наваельні – першы з трох знакавых спартыўных аб’ектаў, якія будуць адкрыты ў гэтым годзе. Неўзабаве чакаецца адкрыццё фізкультурна-аздараўленчага комплексу ў Дзятлаве і воркаўт-пляцоўкі ў Гезгалах. Мы прыступілі да праекта ў Наваельні восенню і на працягу навучальнага года змаглі яго рэалізаваць. У стварэнне пляцоўкі ўкладзены значныя сродкі раённага бюджэту і дапамога спонсараў. Адметна, што ўсе работы выконваліся гаспадарчым спосабам, што зрабіла значна таннейшым выніковы кошт. У Наваельні, як і ў іншых куточках нашага раёна, створаны дастойныя ўмовы для заняткаў спортам для ўсіх жадаючых. Новаяльнянская школа славіцца сваімі дасягненнямі ў адукацыйным працэсе, а з’яўленне спартыўнага аб’екта дапаможа ўмацаваць і спартыўны дух, каб школьнікі развіваліся гарманічна і ўсебакова. Мы рэалізавалі гэты праект на базе школы, таму што менавіта навучальная ўстанова павінна стаць цэнтрам прыцягнення. Тут хопіць месца ўсім – і дзецям, і дарослым, а мы падтрымаем гэта пачынанне спартыўным інвентаром.

У пацвярджэнне сваіх слоў ён уручыў калектыву ўстановы футбольныя і баскетбольныя мячы. Андрэй Уладзіміравіч падзякаваў усім, хто прымаў удзел у стварэнні пляцоўкі і пажадаў новаяльнянцам вялікіх перамог.

Дырэктар Новаяльнянскай сярэдняй школы імя А. А. Шаўчук Алена Круглова падзякавала ўсім, хто меў дачыненне да ўзвядзення новага спартыўнага аб’екта:

– Сёння для нашай школы, а таксама для ўсяго пасёлка адметны дзень – адкрыццё шматфункцыянальнай спартыўнай пляцоўкі, на якой можна гуляць у валейбол, футбол, баскетбол. Але ўсяго гэтага ў нас не было б без дапамогі кіраўніцтва раёна і спонсараў – кіраўнікоў ААТ “Граніт-Агра”, ААТ “Новаяльнянскі камбінат хлебапрадуктаў”, ДРБУ-119, будаўнічых арганізацый, нашых настаўнікам фізічнай культуры, якія сваімі рукамі стваралі пляцоўку, а разам з імі працавалі нашы школьнікі. Дзякуй бацькам навучэнцаў, якія ў час суботніка таксама займаліся добраўпарадкаваннем тэрыторыі. Новая спартыўная пляцоўка – добры імпульс для новых рэкордаў на ўзроўні раёна, вобласці, краіны. Жадаю ўсім удачы, поспехаў.

Цырымонія перарэзвання сімвалічнай чырвонай стужкі дала старт рабоце спартыўнай пляцоўкі, дзе маленькія, юныя і дарослыя жыхары гарпасёлка будуць каваць новыя рэкорды.

Традыцыйна ў беларусаў важныя падзеі пачынаюцца з малітвы. Павіншавалі землякоў са значнай падзеяй і памаліліся за новае пачынанне настаяцель царквы Нараджэння Прасвятой Багародзіцы гарадскога пасёлка Наваельня Валерый Мануйла і ксёндз-пробашч касцёла Сэрца Пана Езуса ў Наваельні, дэкан дзятлаўскі, навагрудскі Алег Жураўскі.

У гонар яе адкрыцця новаяльнянцы запрасілі кіраўніка раёна забіць першы сімвалічны мяч у новая вароты, тым самым заклаўшы добрую традыцыю пераемнасці пакаленняў.

Мерапрыемства прадоўжылася флэш-мобам ад новаяльнянскіх школьнікаў і таварыскім матчам па валейболе.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае