Галоўныя рэкорды – перамога над сабой

16 мая, у Дзень работнікаў фізічнай культуры і спорту, стадыён “Колас” у горадзе Дзятлаве ператварыўся ў арэну вялікіх дасягненняў. Ветэраны спорту, трэнеры, навучэнцы школ і проста аматары сабраліся, каб выканаць нарматывы дзяржаўнага фізкультурна-аздараўленчага комплексу “Гатовы да працы і абароны” і даказаць, што Дзятлаўшчына – край моцных, здаровых і валявых людзей. Сёлета здаць асабісты экзамен на трываласць, спрыт і сілу прыйшлі 147 чалавек ад 6 да 58 гадоў – 26 каманд. Галоўныя рэкорды для іх – гэта не алімпійскія медалі, а перамога кожнага над сабой.

Даведка

У часы СССР комплекс “Гатовы да працы і абароны” здавалі мільёны грамадзян. У Беларусі яго адрадзілі ў 2008-м пад назвай “Дзяржаўны фізкультурна-аздараўленчы комплекс Рэспублікі Беларусь”, а ў 2023-м яму вярнулі гістарычную назву. Знакі, якія ўваходзяць у комплекс, разбіты па ўзросце і катэгорыях. Так, знак “Алімпійскія надзеі” прадугледжаны для ўзросту 6-10 гадоў, ”Спартыўная змена” – 11-17 гадоў, “Фізкультурнік Беларусі” – 18 гадоў і старэйшыя.

Удзельнікаў мерапрыемства павітаў загадчык сектара спорту райвыканкама Дзмітрый Ёда, пажадаў моцнага здароўя, поспехаў у вучобе, працы і высокіх вынікаў як у сённяшніх спаборніцтвах, так і ўвогуле ў падтрыманні спартыўнай формы.

Падарункам для гасцей свята стала паказальнае выступленне юных талентаў Дзятлаўскай дзіцяча-юнацкай спартыўнай школы.

Ва ўрачыстай абстаноўцы павіншавалі і ўзнагародзілі нашых землякоў, якія ўжо дасягнулі не толькі асабістых, але высокіх спартыўных рэкордаў. Падзячныя лісты райвыканкама і грашовыя прэміі атрымалі жаночая зборная каманда раёна па валейболе і яе трэнер Васіль Русін. Таксама свае заслужаныя ўзнагароды атрымалі прызёры каманднага заліку лёгкаатлетычнага забегу “Міля Жалабоўскага”, які прайшоў 1 Мая. Гэта сярэдняя школа № 3 горада Дзятлава імя І. Ю. Філідовіча, Гезгалаўская сярэдняя школа імя М. І. Нядзеліна, Хвінявіцкая сярэдняя школа, ТАА “Ізакам”, КСУП “Хвінявічы”.

Пасля інтэрактыву “Рэкорд на далоні”, які аб’яднаў усіх удзельнікаў спаборніцтваў у адну непарушную каманду раёна, спартсмены прыступілі да здачы нарматываў па скачках у даўжыню, падыманні тулава, падцягванні на перакладзіне, адцісканні, бегу на розныя дыстанцыі. Актыўнымі былі не толькі яны, але і тыя, хто прыйшоў іх падтрымаць. Пацікавіліся, які настрой у спартыўных дзятлаўчан.

Арына Сітніч, навучэнка 4 класа гімназіі № 1 горада Дзятлава:

– Сёння я прыйшла падтрымаць сваю школу, і мне ўсё так спадабалася, што ў наступным годзе абавязкова хачу паўдзельнічаць у такім спартыўным мерапрыемстве, паставіць свае асабістыя рэкорды. Увогуле, вельмі люблю спорт, займаюся каратэ, падабаецца бегаць і рабіць адцісканні.

Яшчэ адна юная спартсменка Васіліса Піскунова з Новаяльнянскай сярэдняй школы імя А. А. Шаўчук паставіла свой асабісты рэкорд у спаборніцтвах… для хлопчыкаў: яна чатыры разы падцягнулася на перакладзіне і даказала, што дзяўчынкі здольныя на многае.

Вольга Кажала, работніца Дзятлаўскага РЭС:

– Удзельнічаю ў здачы такіх нарматываў першы раз. Прыйшла выпрабаваць свае сілы, спадзяюся, што пакажу добры вынік, бо са спортам сябрую даўно.

Вынікі ў асабістым і камандным заліку выпрабаванняў будуць падведзены бліжэйшымі днямі, і пераможцы атрымаюць свае ўзнагароды.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

 #нашелучшее #нашалепшае