Духмяны пар не толькі цела, але і душу лечыць. Гэта выслоўе з’яўляецца для беларусаў неаспрэчнай нормай жыцця. І калі некаторыя жахары шматпавярховых дамоў прамянялі лёгкі пар на кватэрныя зручнасці, то для вяскоўцаў лазня па-ранейшаму застаецца душой паселішча, самым папулярным і наведвальным месцам.
Вёска Руда Яварская нашага раёна – не выключэнне з глыбокіх лазневых традыцый Дзятлаўшчыны. Аднак “калгасная” лазня, адкрытая тут яшчэ ў 50-я гады мінулага стагоддзя, моцна пацярпела ад часу і не магла належным чынам працаваць, патрабаваўся тэрміновы рамонт.
За справу рэканструкцыі ўзяўся гаспадар грамадскай лазні, СВК “Хвінявічы”, які сёння ўзначальвае Мікалай Анатольевіч Бубноўскі. Каб рудаяварцы і ў далейшым мелі магчымасць мыцца з камфортам, у лазні замянілі кацёл на цвёрдым паліве, абнавілі парылку, зрабілі прыбіральню ўнутры памяшкання лазні (раней была толькі ў двары), стварылі пакой для адпачынку.
Лазня пасля рамонту зноў адкрылася перад праваслаўным Вялікаднем, стаўшы найлепшыйм падарункам хрысціянам на вялікае гадавое свята.
— Выдатны пар! – коратка і ёмка характарызуюць перамены пасля рамонту ў лазні мясцовыя жыхары, якія без напаміну кожную суботу прыходзяць сюды.
Наступная ў чарзе на перамены – лазня ў Хвінявічах, у якой аналагічнай рэканструкцыяй абысціся не атрымаецца. Аднак кіраўніцтва СВК “Хвінявічы” не апусціла рукі і ўзялося за капітальны рамонт, які будзе доўжыцца некалькі месяцаў. А тым часам мясцовыя жыхары могуць чакаць адкрыцця лазні з карысцю – нарыхтоўваць венікі, каб пасля папарыцца з імі на славу.
Н. АВЯРЧУК
