Дзятлава – як на далоні…

Як мабільны дадатак “Мой горад” можа палепшыць якасць жыцця жыхароў Дзятлаўскага раёна.

У рамках рэалізацыі тыпавой канцэпцыі развіцця “разумных гарадоў” Рэспублікі Беларусь, распрацаванай Мінсувязі ў 2019 годзе, РУП “Белтэлекам” стварыў мабільны дадатак “Мой горад”. У яго зручнасці і эфектыўнасці для вырашэння розных штодзённых задач ужо даўно пераканаліся жыхары і госці многіх гарадоў Беларусі. Запісацца на прыём да доктара або ў выканкам, іншыя дзяржустановы, азнаёміцца з меню рэстарана, даведацца рэжым работы магазіна, выклікаць аварыйную брыгаду, забраніраваць столік у рэстаране або нумар у гасцініцы, запісацца на экскурсію – дзякуючы платформе, гэта і многае іншае можна зрабіць усяго ў некалькі клікаў.

У дапамогу гараджанам і гасцям горада

Як расказаў начальнік Дзятлаўскага ўчастка электрасувязі Слонімскага занальнага вузла электрасувязі Гродзенскага філіяла “Белтэлекам” Уладзімір Фесяк, дадатак “Мой горад” створаны, каб у кожнага чалавека пад рукой быў просты і даступны канал камунікацый з гарадскім асяроддзем: органамі ўлады, бізнесам, сферамі аховы здароўя, адукацыі, культуры, паслугаў. Для зручнасці карыстання ў дадатку змяшчаецца інфармацыя аб прадпрыемствах і арганізацыях, структураваная па відах дзейнасці – адміністрацыя горада, здароўе і спорт, адукацыя, адпачынак і турызм, транспарт, грамадскае харчаванне, гандаль, камунальныя службы і іншае. Дзякуючы дадатку “Мой горад” узаемадзеянне насельніцтва з гарадской інфраструктурай становіцца лёгкім і прыемным, карыстальнік атрымлівае доступ да інфармацыі, паслугаў і сэрвісу з адзінай сістэмы.

– Адкрываеш мабільны дадатак і бачыш горад як на далоні. Заказаць тавар ці паслугу і адразу аплаціць, забраніраваць нумар у гасцініцы, выклікаць аварыйную брыгаду – усё гэта робіцца вельмі проста ў рэжыме рэальнага часу. Не прыйдзецца фарміраваць дзясяткі пошукавых запытаў у Інтэрнэце, бачыць усё ў адным праграмным прадукце будзе значна зручней. Гэта вялікі плюс для гараджан і гэта камфортна, – адзначыў Уладзімір Фесяк. – Ёсць у дадатку і стужка, дзе размяшчаюцца топ-навіны. Жыхары могуць хутка даведацца аб маючых адбыцца ўрачыстых гарадскіх мерапрыемствах, папярэджаннях МНС і водаканала аб правядзенні тэхнічных работ, часовым закрыцці вуліц для руху транспарту і многім іншым.

Дарэчы, выкарыстоўваючы магчымасці “Майго горада” можна праводзіць апытанні і анкетаванне гараджан. Гэта каштоўная зваротная сувязь для далейшага развіцця горада.

Карысць для арганізацый

Мабільны дадатак з’яўляецца выдатным варыянтам для юрыдычных асобаў і індывідуальных прадпрымальнікаў, якія жадаюць заявіць пра сябе і аб сваёй дзейнасці, прыцягнуць новых кліентаў. На персанальнай старонцы кожная арганізацыя можа размясціць інфармацыю аб рэжыме работы, прадукцыі і паслугах, акцыях і скідках. Функцыянал рэсурсу шырокі і не перастае развівацца, пры гэтым распрацоўшчыкі ўлічваюць пажаданні для паляпшэння ўспрымання і даступнасці прадастаўленай інфармацыі. У напаўненні мабільнага дадатку могуць прыняць удзел розныя суб’екты гаспадарання горада і раёна. Для гэтага дастаткова зрабіць заяўку на сайце moygorod.by або звярнуцца ў сэрвісны цэнтр кампаніі “Белтэлекам” у Дзятлаве, які размешчаны па вуліцы Савецкай, 3А.

– Карысная наша навінка і для турыстычнага сэрвісу. Аматары турызму і проста жадаючыя адпачыць на прыродзе будуць бачыць, куды можна паехаць і дзе можна смачна паабедаць або выпіць ранішнюю каву. Напрыклад, уладальнікі аграсядзібаў змогуць паказваць кантактныя даныя і колькасць свабодных месцаў, размяшчаць фота інтэр’еру і іншую прывабную для турыстаў інфармацыю. “Мой горад” – гэта эфектыўны канал камунікацыі. Сёння пры правільным выкарыстанні нашага рэсурсу любы бізнес можа паспяхова прыцягваць новых кліентаў, а праз пашырэнне мэтавай аўдыторыі, адпаведна, ідзе і дадатковы даход, – дадаў Уладзімір Уладзіміравіч.

Дарэчы, мабільны дадатак “Мой горад” размешчаны ў магазіне дадаткаў і сёння даступны для бясплатнага скачвання, устаноўкі і карыстання на Android і iOS для ўсіх жыхароў і гасцей нашай краіны.

Ірына КАМАРОВА
Фота Вольгі ЮШКЕВІЧ

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga