Дзятлаўскія валейбалісткі – на п’едэстале лідараў рэспублікі

У Раўбічах у фінале рэспубліканскай спартакіяды па валейболе сярод дзяцей і юнацтва, якія займаюцца ў групах і секцыях па месцы жыхарства, бронзавую перамогу атрымала каманда дзяўчынак Гродзенскай вобласці, за якую выступалі дзятлаўчанкі 2011-2012 гадоў нараджэння пад кіраўніцтвам трэнера секцыі па валейболе раённага фізкультурна-спартыўнага клуба Васіля Русіна.

У гісторыі валейбола Дзятлаўшчыны гэта першая вялікая перамога, якая не толькі прывяла нашых зямлячак на п’едэстал лепшых, але дала ім выдатную магчымасць сёлета 10-15 кастрычніка выступіць у горадзе Валгаградзе Расійскай Федэрацыі на этапе спартакіяды Саюзнай дзяржавы па валейболе ў сваёй узроставай катэгорыі.

Гонар Прынёмання і Дзятлаўскага раёна на фінале ў Раўбічах адстойвалі восем нашых юных зямлячак: Ангеліна Ламака, Марыя Масейчык, Паліна Халопік, Кацярына Лявошка, Вікторыя Яраш, Яна Календа, Уладзіслава Лявончык, Паліна Філідовіч. Яны прайшлі няпросты шлях ад пачатку сезона спаборніцтваў, паспяховага абласнога выступлення да рэспубліканскіх баталій, дзе каля турнірнай сеткі сустрэліся самыя моцныя.

У фінальных гульнях сышліся сем каманд: па адной ад кожнай вобласці і горада Мінска. Дзятлаўчанкам давялося спаборнічаць з вельмі сур’ёзнымі саперніцамі. Прабіваючыся да бронзавай перамогі, з лікам 2 : 1 яны абыгралі Мінск. Ва ўпартай барацьбе саступілі 1 : 2 Брэсту. Аднак паражэнне не выбіла дзятлаўскіх валейбалістак з каляі: у фінале яны выйгралі каманду Гомельскай вобласці 2 : 1. Стальную спартыўную волю і загартоўку ў час баталій праявіла капітан каманды, гулец асноўнага саставу Паліна Халопік, якая пасля хваробы выйшла на пляцоўку ў трэці дзень спаборніцтваў і ўнесла ўпэўнены ўклад у перамогу.

– Мы рады, што ўвайшлі ў лік прызёраў рэспублікі, – падзяліўся ўражаннямі Васіль Русін. – Аднак трэцяе месце – не выпадковасць, а вынік напружанай двухгадовай працы спартсменак. Як бачым, яна была не дарэмнай: дзяўчаты праявілі характар і заявілі аб сабе на ўсю краіну.

– Шчыра віншуем каманду з бронзавай перамогай, дзякуем трэнеру за прафесіяналізм, укладзеныя працу і час. Удзячнасць адрасуем таксама бацькам дзяўчат і ўсім, хто падтрымліваў валейбалістак, настройваў іх на вынік, – зазначыла дырэктар раённага ФСК Вольга Васіленка. – Спартсменкі даказалі, што дзятлаўская школа валейбола здольная дастойна канкурыраваць на рэспубліканскім узроўні. Жадаем камандзе новых поспехаў.

Ірына СТЫРНІК

Фота ўдзельнікаў

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае