Дзятлаўская раённая бібліятэка адкрыла “БібліяАрбат”

Пачатак лета – гэта заўсёды час для весялосці, драйву і незабыўных прыгод. Менавіта такую атмасферу падарыла дзецям Дзятлаўская раённая бібліятэка, якая запрасіла хлопчыкаў і дзяўчынак на незвычайнае свята. На некалькі гадзін бібліятэчная пляцоўка ператварылася ў сапраўдны “БібліяАрбат” – чароўны свет, напоўнены звонкім смехам, творчасцю і цудамі.

З самага пачатку дзеці трапілі ў вір весялосці, бо на пляцоўцы іх сустракалі самыя бліскучыя майстры добрага настрою – вясёлыя клоўны Клёпа і Ірыска. Яны імгненна зарадзілі кожнага госця пазітывам, наладзілі на гульнявы лад.

Каб падарожжа па “Арбаце” было па-сапраўднаму азартным, кожная каманда атрымала спецыяльную карту падарожніка. Задача была творчай: прайсці чатыры неверагодныя лакацыі, на кожнай з якіх трэба было выканаць заданні і атрымаць запаветны смайлік.

Першай сустракала гасцей “Казачная лакацыя”. Тут дзяцей чакаў сюрпрыз: цэлы калейдаскоп рухомых гульняў і запальных танцаў.

“Тэатральная лакацыя” запрасіла юных гасцей уключыцца ў захапляльны квэст-дэтэктыў “У пошуках залатога ключыка”. Кемлівасць, логіка і акцёрскае майстэрства дзятлаўскіх дзяцей перамаглі.

Адчуць дух роднага краю і дакрануцца да вытокаў дапамагла “Фальклорная лакацыя”. Гэта месца, дзе літаральна ажывалі народныя традыцыі, трапныя прымаўкі і старадаўнія забавы. Для тых, хто прагнуў актыўнага руху і інтэлектуальных баталій, працавала “Гульнёвая лакацыя” – тэрыторыя абсалютнага драйву і безлімітных забаў. Тут усіх чакалі шашкі, настольныя гульні і мноства іншых цікавінак, дзе кожны змог знайсці занятак па душы і праявіць свае здольнасці.

Свята атрымалася яркім і душэўным. Самыя актыўныя ўдзельнікі былі ўзнагароджаны дыпломамі.

Марына БОРТКА,
бібліятэкар

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga