Дзятлаўчане – з бронзай “Залатой шайбы”

У горадзе Лідзе завяршыўся фінальны этап абласных спаборніцтваў па хакеі “Залатая шайба” ў дывізіёне “Б” на прызы Прэзідэнцкага спартыўнага клуба, у якіх прынялі ўдзел два саставы каманды “Алмаз” Дзятлаўскага раёна.

Хакеісты малодшай узроставай групы  (2010-2012 г. н.) правялі тры гульні ў барацьбе за хакейны кубак: перамаглі каманду Навагрудскага раёна з лікам 17 : 0 і саступілі зборнай Шчучыншчыны – 5 : 6. У барацьбе за трэцяе месца дзятлаўчане атрымалі ўпэўненую перамогу над хакеістамі Карэліцкага раёна – 3 : 0 і сталі бронзавымі прызёрамі абласных спаборніцтваў.

Хакеісты старэйшай узроставай групы (2008-2009 г. н.) правялі чатыры гульні, у трох з якіх абыгралі сапернікаў з Ваўкавыска (8 : 1), Карэліцкага (7 : 3), Навагрудскага (9 : 2) раёнаў, саступілі камандзе Смаргонскага раёна (2 : 3) і ў выніку спыніліся за крок ад п’едэстала.

Лепшымі бамбардзірамі спаборніцтваў сталі: Мікіта Санюк (10 шайбаў), Вадзім Глубокі (9), Расціслаў Гародка і Мацвей Іванчык (па 5).

Некаторыя юныя хакеісты Дзятлаўшчыны прымуць удзел у саставе камандаў-пераможцаў Шчучынскага і  Смаргонскага раёнаў на рэспубліканскіх спаборніцтвах “Залатая шайба” ў сакавіку.

– Дзякуем усім балельшчыкам, бацькам хакеістаў, кіраўніцтву раёна за вялізную падтрымку і веру ў нашы каманды, – адзначыў трэнер “Алмаза” Дзмітрый Ёда. – Прадаўжаем работу над тэхнікай і зладжанасцю, праз год зноў пазмагаемся за хакейнае першынство.

Наталля АВЯРЧУК

Фота ўдзельнікаў гульні і LidaNews.by

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga