Добраўпарадкаванне. Аляксандр Бараноўскі: “Дэпутаты павінны паказваць прыклад”

У Беларусі да завяршэння набліжаецца добраахвотная рэспубліканская акцыя “Лес! Дабро! Парадак!”, якая пачалася 16 сакавіка і скончыцца 18 красавіка, прадаўжаецца месячнік па навядзенні парадку.

Дзятлаўчане іх актыўна падтрымліваюць. На гэты раз свой уклад у чысціню ляснога масіва, які знаходзіцца на ўскрайку горада Дзятлава за заправачнай станцыяй, унёс дэпутацкі корпус раёна.

– Акцыя скіравана на навядзенне парадку ў лясным фондзе, падрыхтоўку месцаў масавага адпачынку да летняга сезона, добраўпарадкаванне памятных пахаванняў, абнаўленне лясоў. – расказаў старшыня раённага Савета дэпутатаў Аляксандр Бараноўскі. – Разам нашы суайчыннікі імкнуцца прывесці ў належны выгляд і памножыць адно з галоўных прыродных багаццяў, якім валодае Радзіма, – лес. Першымі работы па добраўпарадкаванні ў гэтым масіве праводзілі супрацоўнікі раённага выканаўчага камітэта. Сёння ж грамадскую ініцыятыву пераняў дэпутацкі корпус раёна. Надвор’е выдалася сонечным, цёплым. Разам тут з задавальненнем працуюць дэпутаты раённага Савета дэпутатаў, старшыні сельскіх выканаўчых камітэтаў, прыйшлі на дапамогу і супрацоўнікі раённага аддзела па надзвычайных сітуацыях. Упэўнены: калі ўсе работы ў гэтым урочышчы скончацца, жыхарам і гасцям раёна будзе прыемна любавацца мясцовымі краявідамі, бо побач знаходзіцца ажыўленая траса і заправачная станцыя.

Падобныя ініцыятывы даўно сталі добрай традыцыяй для дэпутатаў раёна. Да мерапрыемстваў і акцый на карысць малой радзімы мы далучаемся кожны год па некалькі разоў – вясной і восенню. Сярод акцый, у якіх прымаем удзел, “Дай лесу новае жыццё”, ініцыятывы па ўборцы памятных месцаў, суботнікі. Упэўнены, што, у першую чаргу, дэпутаты павінны паказваць станоўчы прыклад насельніцтву і выбаршчыкам, каб і людзі не заставаліся раўнадушнымі, у якіх умовах мы жывём. Беларусь славіцца сваёй прыгажосцю і чысцінёй, а іх ствараем мы разам.

– Вельмі рады, што на граніцы тэрыторыі нашага сельсавета наводзіцца парадак. Людзям будзе прыемна, радасна праязджаць па добраўпарадкаваных мясцінах, тым больш, што побач знаходзіцца помнік на брацкай магіле знішчаных у гады Вялікай Айчыннай вайны жыхароў Дзятлаўскага гета, – зазначыў старшыня Дзятлаўскага сельвыканкама Ігар Хітро. – Недалёка праходзіць дарога да санаторыя “Радон”, рух па ёй ажыўлены, нярэдка міма праязджаюць госці, у тым ліку з іншых краін, таму хочацца, каб тут былі прыгожыя і дагледжаныя краявіды.

Увогуле сельвыканкамы заўжды падтрымліваюць прапановы жыхароў сельскіх саветаў па навядзенні парадку. Людзі найчасцей звяртаюцца з ініцыятывай па навядзенні чысціні на вясковых могілках. Менавіта з падобнымі просьбамі да мяне тэлефануюць старасты населеных пунктаў. На іх адгукваемся, арганізуем суботнікі. Людзі самі зацікаўлены ў чысціні і добраўпарадкаванні. Напрыклад, сёлета ўжо пачаты работы на могілках вёскі Пенчыцы, удзел у іх прымуць і мясцовыя жыхары. Цяпер сумесна з сельскагаспадарчым філіялам “АграМілк” ажыццяўляецца высечка хмызнякоў у аграгарадку Раклевічы каля помнікам загінулым землякам. Стараемся, каб як мага больш куточкаў сельскай мясцовасці набывала прыемны выгляд.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае