Дэпутацкія клопаты. Як жывеш, гарадскі пасёлак Казлоўшчына?

У час рабочага візіту на Дзятлаўшчыну выязны прыём грамадзян у будынку Казлоўшчынскага сельвыканкама правёў дэпутат Палаты прадстаўнікоў Нацыянальнага сходу Рэспублікі Беларусь Міхаіл Орда.

Да Міхаіла Сяргеевіча па пытаннях, якія тычыліся добраўпарадкавання, звярнуліся дзве жыхаркі гарадскога пасёлка.

Пасля прыёму, каб даведацца, якая работа праводзіцца на тэрыторыі сельсавета для забеспячэння дастойнага ўзроўню жыцця людзей, дэпутат агледзеў вуліцы і ўстановы гэтага населенага пункта. Разам са старшынёй Казлоўшчынскага сельвыканкама Алай Гародка ён пабываў у мясцовым магазіне “Родны Кут”, пацікавіўся асартыментам тавараў напярэдадні каталіцкага і праваслаўнага святаў, у Казлоўшчынскай сярэдняй школе аб адукацыйным працэсе пагутарыў з дырэктарам Ігарам Данільчыкам, а затым накіраваўся на крыніцу ў гонар іконы Божай Маці “Живоносный Источник”, якая знаходзіцца ў маляўнічым куточку гарадскога пасёлка і стала прывабным месцам для адпачынку людзей.

У Чысты чацвер напярэдадні Вялікадня Міхаіл Сяргеевіч, падтрымліваючы добрыя народныя традыцыі, пакаштаваў сцюдзёнай вады і абмыў ёю твар. Сваім землякам дэпутат адрасаваў самыя шчырыя і добрыя пажаданні да свята – здароўя, шчасця, міру, дабрабыту.

Напрыканцы ён падвёў вынікі рабочага візіту:    

– Жыхары Казлоўшчыны звярнуліся на прыём з пытаннем, аб якім гаварыў Прэзідэнт Беларусі Аляксандр Лукашэнка на інаўгурацыі, калі адзначаў, што гэта пяцігодка будзе пяцігодкай якасці. За яе нам належыць зрабіць як мага больш, каб наблізіць умовы жыцця сельскага насельніцтва да гарадскога. Зварот, які падпісалі жыхары Казлоўшчыны, якраз тычыцца камфортнага пражывання, арганізацыі зоны адпачынку каля мясцовага возера. Яго цяпер якраз прыводзяць у парадак, выдзелены грошы, пытанне кантралюе і адсочвае райвыканкам, ёсць спонсары. Мной дадаткова будзе накіраваны дэпутацкі зварот у арганізацыі, якія гэтым займаюцца. Упэўнены, што гэта зона адпачынку атрымаецца прыгожай і патрэбнай для людзей.

Наведалі сёння і Казлоўшчынскую сярэднюю школу, дзе ўзнімалася яшчэ адно актуальнае пытанне – нагрузкі на настаўнікаў з-за справаздачаў. Тэма неаднаразова закраналася на ўзроўні кіраўніка дзяржавы і ўрада, бо паступалі скаргі наконт вялікіх аб’ёмаў дакументаў, папераў, якія часам дубліруюць адна адну і гэта забірае час, што павінен траціцца на вучэбна-выхаваўчую работу. Мы пагутарылі, пытанні, якія былі закрануты, абавязкова будуць накіраваны ў Міністэрства адукацыі на імя міністра для адпаведнага рэагавання.

Наступная тэма абмяркоўвалася з прадстаўнікамі прыватнага бізнесу Дзятлаўскага раёна. Яна тычылася заканадаўства, у якое цяпер з улікам даручэнняў Прэзідэнта ўносяцца змяненні і дапаўненні для стварэння больш спрыяльных умоваў для бізнес-асяроддзя, каб людзі, якія займаюцца прадпрымальніцтвам, атрымалі больш шырокія магчымасці для развіцця сваёй справы, а гэта і працоўныя месцы, і падаткі, і ў цэлым вельмі важныя дзяржаўныя задачы. Прапановы, што прагучалі, будуць накіраваны ў структуры, якія абагульваюць усю інфармацыю для ўнясення патрэбных і важных змяненняў у заканадаўства краіны.

Яшчэ адно пытанне, якое чакае рэагавання, паступіла ад жыхароў вёскі Горка, яно таксама наконт добраўпарадкавання і ўзята на дэпутацкі кантроль.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga