Дэпутацкія клопаты. Міхаіл Орда: “Для вырашэння праблемы трэба шукаць розныя варыянты”

Асабісты прыём грамадзян у Дзятлаўскім райвыканкаме правёў дэпутат Палаты прадстаўнікоў Нацыянальнага сходу Рэспублікі Беларусь Міхаіл Орда.

На гэты раз да яго звярнуліся жыхары вёскі Студзераўшчына Войневіцкага сельскага савета з просьбай аб дапамозе ў вырашэнні набалелага для іх пытання па добраўпарадкаванні зямельнага ўчастка. Аварыйнае дрэва, якое знаходзіцца на іх тэрыторыі, падлягае спілоўванню, але паслуга гэта, на жаль, платная і, як аказалася, дорага каштуе.

Міхаіл Сяргеевіч, каб праясніць сітуацыю, запрасіў да размовы старшыню Войневіцкага сельвыканкама Вольгу Мазоль, выслухаў прапановы іншых зацікаўленых службаў. Даў даручэнне прааналізаваць усе магчымыя варыянты ў вырашэнні гэтай праблемы, а гаспадарам участка – выбраць аптымальны для іх.

Акрамя таго, былі пытанні і наконт добраўпарадкавання некаторых аб’ектаў агульнага карыстання райцэнтра. На некаторыя з іх адказ быў дадзены ўжо ў час прыёму, другія ж дэпутат паабяцаў трымаць у полі зроку.

Для больш дэталёвага ўдакладнення сітуацыі з папярэднімі зваротамі на прыёме прысутнічаў і старшыня Жукоўшчынскага сельвыканкама Іван Свіб. Як ён адзначыў, ёсць ужо многа станоўчых прыкладаў у вырашэнні пытанняў па зваротах жыхароў аграгарадка Гезгалы. Гэтыя, а таксама  пытанні асфальтавання дарог паміж сельскімі населенымі пунктамі, упарадкавання стадыёна ў вёсцы Горка дэпутат трымае на кантролі.

– Усе пытанні важныя, таму што датычацца жыцця людзей, іх бяспекі.  Нягледзячы часам на складанасці, вырашаць іх станоўча патрэбна абавязкова, – падвёў вынікі прыёму Міхаіл Орда.

Таццяна САНЮК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga