Ад усёй душы віншую вас з вялікім святам Нараджэння Хрыстова!
У гэтыя дні мы чуем у храмах Божых узнёслыя і ўрачыстыя словы: “Хрыстос нараджаецца – слаўце!”. І не толькі царкоўны каляндар, але і самі сэрцы нашы, поўныя духоўнай весялосці, заклікаюць праслаўляць Нараджэнне Госпада Бога і Збавіцеля нашага Ісуса Хрыста! Увесь праваслаўны свет радуецца з нагоды Нараджэння Збавіцеля!
У свята Нараджэння Хрыстовага наша ўсведамленне напаўняецца тым, што адбылося больш за дзве тысячы гадоў таму. “І Слова стала плоццю, і знаходзілася з намі…” (Ін. 1,14). У гэтых словах Евангельскай ісціны нам прыадкрываецца сутнасць найвялікшай падзеі ў гісторыі свету, найвялікшага таінства – Увасаблення Сына Божага. Па бязмежнай любові Сваёй народжаны “прежде всех век” становіцца Сынам чалавечым, Сынам Прачыстай Дзевы і, успрыняўшы нашу існасць, злучае неба з зямлёю, людзей з анёламі, паказвае таямніцу Трохіпастаснага бажаства, каб зрабіць нас дзецьмі Божымі – сынамі Свайго вечнага Царства.
З прышэсцем у свет Хрыста Збавіцеля Бог явіў роду чалавечаму Сваю бязмежную любоў і ласку. Бог прыйшоў на зямлю, каб выратаваць кожнага з нас! Прышэсце Хрыста Збавіцеля ў свет карэнным чынам змяніла чалавечае жыццё і саму нашу прыроду. І свята Нараджэння Хрыстова нагадвае нам усім аб тым, якая мэта жыцця любога чалавека, у чым сэнс нашага быцця. Цяпер зноў ззяе над светам Віфлеемская зорка, абвяшчаючы вечную сілу і праўду з’яўлення Збавіцеля і азараючы шлях для ўсіх нас!
У гэтыя святыя дні жадаю ўсім вам, дарагія браты і сёстры, духоўнай радасці! Жадаю, каб усе мы ішлі за Хрыстом Збавіцелем! Жадаю, каб наша жыццё было славаю Госпаду і праслаўленнем Бога! Сучаснае жыццё перад кожным хрысціянінам ставіць шмат задач, галоўная з якіх – сведчыць пра веру. Нярэдка мы самі маем патрэбу ва ўласным ператварэнні. Не так проста сёння застацца верным Богу ў кожнай сваёй справе і слове, не заўсёды мы спяшаемся паступіць па-евангельску. Таму жадаю, перш за ўсё, дапамогі Божай у духоўным адраджэнні кожнага з нас, кожнага жыхара Дзятлаўскай зямлі. Няхай святло Нараджэння Хрыстова напаўняе, асвятляе і сагравае наша жыццё!
Дарагія браты і сёстры! Віншуючы са святам Нараджэння Хрыстова, жадаю таксама ўсім вам у набожнасці і чысціні, у міры і здароўі пражыць гэты новы год!
Няхай Міласэрны Гасподзь Бог дорыць усім моцнае здароўе і сілы для працы на славу Божую! Няхай кожны дзень будзе годна пражытым днём кожнага з нас! Жадаю дабрабыту, вялікага сямейнага і асабістага шчасця, поспехаў ва ўсіх добрых пачынаннях! Хачу пажадаць, каб гэты год быў годам вялікіх дабротаў Божых. Каб гэтыя даброты не пакідалі нас, і Гасподзь захоўваў усіх нас.
Іерэй Іаан КІСЕЛЬ,
благачынны Дзятлаўскай царкоўнай акругі
