Многія гаспадаркі Дзятлаўшчыны завяршылі сяўбу цукровых буракоў і пачалі сеяць кукурузу. Тым, хто яшчэ не паспеў адсеяцца, дапамагаюць калегі-землякі.
Так, на палетку КСУП “Жукоўшчына” на сяўбе буракоў працуе вопытны механізатар КСУП “Войневічы” Аляксандр Сіўко на сваім новым МТЗ 1221.3, які атрымаў для работы на пачатку года, з дванаццацірадковай бурачнай сеялкай.
– Дома буракі адсеялі, план закрылі, цяпер прыбылі ў КСУП “Жукоўшчына” для аказання дапамогі. Поле роўнае, таму працуецца добра. Для эфектыўнай укладкі насення ў глебу вытрымліваю тэхналагічную хуткасць сяўбы ў 5,5 кіламетра ў гадзіну, таму спраўлюся дні за чатыры.
Сёлета Аляксандр Уладзіміравіч паспеў папрацаваць на ўнясенні арганічных угнаенняў. Наперадзе яго чакае сяўба кукурузы і касьба траў у роднай гаспадарцы. Усім, хто гэтымі вясновымі днямі працуе ў полі, ён жадае ўдачы, каб тэхніка не ламалася, а дома чакалі блізкія.
Аграном-насеннявод КСУП “Жукоўшчына” Уладзіслаў Царук кантралюе працэс на полі. Ён расказаў, што згодна з планам у гаспадарцы будзе пасеяна 156 гектараў цукровых буракоў, для гэтага набылі гатункі “Лімузін”, “Анаконда”, “Брава”.
Аб планах на новы сельскагаспадарчы сезон і іх рэалізацыі расказала галоўны аграном прадпрыемства Вераніка Аўцынава:
– Сёлета пасеяна 50 гектараў яравога піваваранага ячменю, 50 гектараў гароху, 62 гектары пшаніцы. Сеем цукровыя буракі, дзякуй суседзям за дапамогу ў гэтай справе. Прыступаем да агародніны – цыбулі, сталовых буракоў, морквы, капусты, бульбы. Таксама тэхніка і насенне гатовы да сяўбы кукурузы: 100 гектараў на зерне і 700 – на зялёны корм. Паралельна праводзім інсектыцыдную і гербіцыдную апрацоўку пасеваў рапсу і збожжавых. У планах – завяршэнне ўсіх работ да Дня Перамогі.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#АПК #сельское хозяйство
