Чырвоны Крыж: дапаможам школьнікам разам

З 1 жніўня па 15 верасня на Дзятлаўшчыне праходзіць рэспубліканская дабрачынная кампанія “Збяром дзяцей у школу!”.

Прымеркавана яна да Дня ведаў. Мае на мэце падтрымаць матэрыяльна дзяцей з сацыяльна неабароненых катэгорый сем’яў.

Сабраць дзіця ў школу сёння – выпрабаванне для бюджэту кожнай сям’і. А некаторым школьнікам Дзятлаўшчыны асабліва патрэбны наш з вамі ўдзел. Хочаце не застацца раўнадушнымі? Што для гэтага зрабіць, тлумачыць старшыня раённай арганізацыі Чырвонага Крыжа Галіна Касцюк.

Куды звяртацца?

– Усіх добрых сэрцам людзей, якія хочуць дапамагчы школьнікам раёна, мы чакаем у Цэнтры сацыяльнага абслугоўвання насельніцтва, а таксама – у раённай арганізацыі Чырвонага Крыжа. Акрамя таго, у магазінах і на імправізаваных пляцоўках працуюць нашы валанцёры, якія растлумачаць акалічнасці акцыі і прымуць дапамогу для школьнікаў.

Што прыносіць?

– Прыдасца любая дапамога. Вы можаце ахвяраваць для дзяцей школьную форму, абутак або школьную сумку, якімі карысталіся вашы дзеці і якія добра захаваліся. Або набыць канцылярскія прылады (будзем рады і сшытку, і алоўкам) ці нават пералічыць грошы на рахунак абласной арганізацыі Чырвонага Крыжа, за якія мы набудзем школьныя рэчы. Будзем рады, калі да акцыі далучацца не толькі жыхары раёна, але і арганізацыі, прыватныя прадпрымальнікі.

Хто атрымае дапамогу?

– Усе сабраныя рэчы і сродкі будуць накіраваны мэтава для школьнікаў Дзятлаўскага раёна. Спісы тых, каму патрэбна падтрымка, мы ўзгаднілі з аддзелам адукацыі Дзятлаўскага райвыканкама. Дапамогу атрымаюць восем дзяцей з Дзятлава, Казлоўшчыны, Раклевічаў, Маськаўцаў, Жукоўшчыны.

Усе рэчы, сабраныя ў час кампаніі “Збяром дзяцей у школу!”, школьнікі атрымаюць да 10 верасня.

Наталля АВЯРЧУК