Першы этап рэспубліканскай акцыі “Бяспечны Новы год” на Дзятлаўшчыне адбыўся ў санаторыі “Радон” ААТ “Белаграздраўніца”.
Па ўзгадненні з галоўным доктарам установы Леанідам Карпішэвічам, акцыя Міністэрства па надзвычайных сітуацыях была ўключана ў канцэртную праграму, якая прайшла на базе санаторыя.
У зале ўстановы аздараўлення сабралася каля 200 чалавек, перад якімі выступіў інспектар Дзятлаўскага РАНС Аляксандр Беленка.
— Мяркую, пераважная большасць з тых, хто сёння прысутнічае ў гэтай зале, сустрэне навагоднія і калядныя святы дома. Як правіла, святкаванне Новага года не абыходзіцца без піратэхнікі, з якой прашу вас быць асабліва асцярожнымі, – адзначыў выступоўца.
Прысутныя пачулі парады, як засцерагчы сябе ў святы ад непрыемных сюрпрызаў. Інспектар яшчэ раз нагадаў аўдыторыі, як правільна і бяспечна ставіць навагодняе дрэва дома, якія ўпрыгажэнні можна выкарыстоўваць, а ад якіх лепш адмовіцца. Ён прапанаваў замацаваць гэтыя веды праглядам відэафільма пра навагоднія здарэнні, а пасля павіншаваў усіх з надыходзячымі святамі.
З 14 снежня пачаўся другі этап акцыі “Бяспечны Новы год”, які праходзіць ва ўстановах адукацыі раёна. Ва ўсіх школах горада Дзятлава адбыліся бацькоўскія сходы з удзелам супрацоўнікаў Дзятлаўскага РАНС, у навучальных установах раёна – прафілактычныя гутаркі. Ратаўнікі яшчэ раз нагадалі бацькам школьнікаў аб асаблівых правілах бяспекі ў Новы год і адміністрацыйнай адказнасці, якую бацькі панясуць за сваіх дзяцей-свавольнікаў, аматараў забаўляцца з петардамі.
Акцыя працягнецца ва ўстановах дашкольнай адукацыі.
Н. АВЯРЧУК
