Аляксандр Лукашэнка ў якасці зноў абранага Прэзідэнта Беларусі афіцыйна заняў пасаду кіраўніка дзяржавы. Цырымонія інаўгурацыі адбылася ў Палацы Незалежнасці. Беларускі лідар выступіў з інаўгурацыйнай прамовай.
– Мы з вамі стварылі суверэнную дзяржаву. Нам ёсць чым ганарыцца. Што ведалі ў свеце пра Рэспубліку Беларусь нейкіх тры дзясяткі гадоў таму? Амаль нічога. Каму мы былі цікавыя? Мабыць, нікому. А сёння? Сёння наша краіна загучала на ўвесь свет, сёння мы маем значэнне. Мы глядзім за гарызонт. Робім усё, каб нашы дзеці і ўнукі, а потым іх дзеці і ўнукі жылі ў сваёй мірнай і квітнеючай дзяржаве, на сваёй зямлі, – зазначыў Аляксандр Рыгоравіч.
Меркаваннем наконт прамовы Прэзідэнта і таго шляху, якім ідзе Беларусь, падзялілася сакратар раённага савета ветэранаў Ядвіга Гушча:
– Калі зазірнуць у мінулае, то тры дзясяткі гадоў таму, калі Аляксандр Рыгоравіч заступіў на свой першы тэрмін прэзідэнцтва, у беларусаў было шмат складанасцяў, асабліва гэта тычылася эканомікі, якая раней была “ўбудавана” ў савецкую, а пасля скасавання СССР згубіла гэтыя сувязі: закрываліся прадпрыемствы, значна знізіўся дастатак насельніцтва.
Мы, сённяшнія пенсіянеры, а тады працоўныя людзі, прайшлі на чале з кіраўніком дзяржавы няпросты шлях, каб цяпер мець магчымасць дастойна жыць, працаваць, адпачываць. Нягледзячы на ўсе іспыты, якія беларусы годна вытрымалі на шляху сваёй незалежнасці, наша краіна стала моцнай, прыгожай, камфортнай для жыцця, гасціннай для наведвальнікаў, а галоўнае – засталася мірнай. Беларусь прадаўжае міралюбівую палітыку, не губляючы памяці аб сваім гістарычным мінулым, захоўваючы духоўныя і нацыянальныя каштоўнасці, што ў 2022 годзе шляхам усенароднага галасавання на рэферэндуме замацавана ў Канстытуцыі нашай дзяржавы. А сёлета разам з суайчыннікамі на выбарах мы годна пацвердзілі давер беларускаму лідару.
На сучасным этапе Рэспубліка Беларусь ганарыцца сваімі дасягненнямі, нашу краіну і Прэзідэнта Аляксандра Лукашэнку ведаюць ва ўсім свеце. Мы актыўна супрацоўнічаем з дзяржавамі, якія не дыктуюць умовы, а імкнуцца да партнёрства. Беларускую прадукцыю ведаюць не толькі ў суседняй Расіі, але і на Афрыканскім кантыненце, у Індыі, Кітаі, многіх іншых дзяржавах. Нас паважаюць, да нас прыязджаюць па новыя ўражанні, у чым я асабіста ўпэўнілася некалькі дзён таму, калі ў саставе дэлегацыі прадстаўляла Дзятлаўшчыну на 27-й міжнароднай выставе-кірмашы турыстычных паслуг “Адпачынак-2025”.
Беларусы крочаць у нагу з часам, развіваюць ІТ-сферу і новыя напрамкі ў навуцы. Раней я працавала эканамістам, і даводзілася ўсё падлічваць і запісваць уручную. Прайшла камп’ютарызацыя –работа сучасных спецылістаў значна аблегчана, а мабільная і інтэрнэт-сувязь дазваляюць за лічаныя хвіліны перадаваць і атрымліваць любую інфармацыю. Я задаволена, што ўвайшла ў гэты рытм, бо цяперашняя дзейнасць у савеце ветэранаў таксама звязана з камп’ютарам. А яшчэ вельмі шчаслівая, што і на пенсіі магу працаваць, прыносіць карысць роднай дзяржаве. Цудоўна, што беларускім пенсіянерам, у якіх ёсць здароўе і жаданне, далі такую выдатную магчымасць.
У нас павышаецца дабрабыт насельніцтва, на паліцах магазінаў багаты выбар харчовых і нехарчовых тавараў, нават чорнага хлеба прапануецца з дзясятак гатункаў, што ўжо казаць пра малочную і мясную прадукцыю. Калі ж ёсць дастатак, то і жывецца весялей.
Я задаволена тым, што маю, тымі магчымасцямі, якія ёсць у нашых дзяцей і ўнукаў, а за маладым пакаленнем – будучыня Беларусі. Радуе, што ў нас шмат кемлівых і таленавітых маладых людзей, дзякуючы якім, я ўпэўнена, будучыня нашай Айчыны складзецца паспяхова і шчасліва. Застаецца толькі пажадаць, каб у нашым грамадстве панавалі мір і згода, каб і надалей беларусы маглі ганарыцца сваёй Радзімай і радавацца жыццю.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Дятловщина #нашалепшае #нашелучшее #Президент #власть
