20 сакавіка на Дзятлаўшчыне прайшоў Адзіны дзень інфармавання насельніцтва. У Дзятлаўскім філіяле ААТ “Молочный Мир” выступіла інфармацыйная група старшыні райвыканкама Андрэя Садоўскага, старшыні раённага Савета дэпутатаў Аляксандра Бараноўскага – у Цэнтры сацыяльнага абслугоўвання насельніцтва Дзятлаўскага раёна, абласная інфармацыйна-прапагандысцкая група на чале з начальнікам галоўнага ўпраўлення ідэалагічнай работы і па справах моладзі Гродзенскага аблвыканкама Ігарам Булаўкам сустрэлася з калектывам ААТ “Дзятлаўскі лікёра-гарэлачны завод “Алгонь”, працавалі таксама групы намеснікаў старшыні райвыканкама.
На мінулым тыдні наша краіна адзначыла адно з галоўных святаў, таму звярнуліся да тэмы “Канстытуцыя Рэспублікі Беларусь – прававы падмурак адзінства і працвітання беларускага народа”.
– Любая суверэнная дзяржава, якая праводзіць незалежную палітыку, павінна мець сваю Канстытуцыю, – падкрэсліў Ігар Булаўка. – Канстытуцыя Беларусі – гэта сапраўды народны дакумент. Першы крок у самастойную будучыню быў зроблены ў складаны для эканомікі нашай маладой дзяржавы 1994 год з прыняццем Асноўнага закона. Сёння ў нас мірная і працвітаючая краіна, бо Канстытуцыя сфармулявала нашы прынцыпы жыцця, інтарэсы грамадства і з’яўляецца шчытом ад знешняга негатыўнага ўплыву. Наколькі далікатнымі могуць быць адзінства і стабільнасць у грамадстве і наколькі зацікаўлены Захад, каб у нас былі непарадкі, паказаў 2020 год. Таму змяненні і дапаўненні, якія ўнесены ў 2022 годзе, ды і за ўсе тры дзесяцігоддзі ў Канстытуцыю, былі абумоўлены дынамікай развіцця грамадства, інтарэсамі народа і геапалітычнымі падзеямі, якія адбываліся вакол Беларусі. Галоўныя з іх – захаванне традыцыйных духоўных і сямейных каштоўнасцяў, гістарычнай праўды аб Вялікай Айчыннай вайне. Каб для наступных пакаленняў пакінуць незалежную і развітую краіну, для нас не павінна быць сумненняў у тым, што Вялікая Перамога – гэта перамога савецкага народа над нацызмам. Сёлета мы адзначаем 80-годдзе Перамогі – усенароднае свята, якое павінны перадаць нашчадкам, і гэта замацавана ў Канстытуцыі.
Віншую вас і з нашым выбарам Прэзідэнта, які зрабілі на пачатку года, прагаласаваўшы за Аляксандра Лукашэнку. Менавіта ён стаяў ля вытокаў развіцця краіны, быў ініцыятарам унясення змяненняў у Канстытуцыю, а моцная прэзідэнцкая рэспубліка паказала, што гэты шлях вядзе да дабрабыту і мірнага жыцця ўсяго насельніцтва Рэспублікі Беларусь.
– Усе важныя пытанні, якія вызначалі далейшае развіццё краіны, заўжды выносіліся на рэферэндумы для ўсенароднага галасавання, – прадоўжыў тэму старшыня райвыканкама Андрэй Садоўскі. – Наколькі правільнымі былі прынятыя рашэнні, можна ўбачыць сёння па стане эканомікі, а ўсё пазнаецца ў параўнанні: пасля скасавання Савецкага Саюза яго былыя рэспублікі развіваліся па-рознаму. Важна, што ўсяго, чым цяпер ганарымся, мы, беларусы, дасягнулі самі, сваёй стараннай працай.
Калі спыніцца на апошніх дасягненнях раёна, то мінулы год для Дзятлаўшчыны быў выніковы: у сацыяльныя праекты ўкладзена больш за 8,5 мільёна свабодных астаткаў. Паралельна ішлі пятнаццаць будоўляў, зроблены капрамонт васьмі шматкватэрных дамоў, дзе 90 % затрат – раённыя бюджэтныя сродкі. Сёлета таксама ажыццяўляюцца капрамонт трох дамоў (каля 5,5 тысячы метраў квадратных), будаўнічыя работы моста на Нагародавічы і моста праз раку Шчару, Новаяльнянскай гарадской бальніцы, завяршаецца капрамонт даху сярэдняй школы № 3 горада Дзятлава, выдзелены сродкі на рамонт дахаў гімназіі і Гезгалаўскай сярэдняй школы, а ў цэнтральнай раённай бальніцы – на рамонт лабараторыі і мамаграфічна-флюараграфічнага кабінета. Прадоўжым рамантаваць дарогі, добраўпарадкаваць неселеныя пункты.
У рамках Адзінага дня інфармавання пагаварылі таксама аб прафілактыцы злачынстваў, звязаных з выкарыстаннем інфармацыйна-камунікацыйных тэхналогій, у тым ліку вымагальніцтваў і махлярстваў, мерах па супрацьдзеянні незаконнаму абароту наркотыкаў, рэалізацыі дзяржаўнай палітыкі ў сферы прафілактыкі наркаманіі сярод насельніцтва і рэсацыялізацыі нарказалежных, навядзенні парадку на прыдамавых тэрыторыях і звязанай з гэтым актуальнай праблеме – выпальваннях сухой расліннасці, таксама спыніліся на бяспецы дзяцей у час канікулаў і правядзенні прафілактычнай акцыі “За бяспеку разам”. Удзельнікам сустрэч была прадстаўлена кінастужка Ігара Лосіка “Свабода слова”.
Ірына СТЫРНІК
Фота Наталлі АВЯРЧУК, Святланы ГРЫШЫНАЙ, Ірыны СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#единый день информирования #Дятловщина #нашалепшае #нашелучшее
