Адзіны дзень інфармавання. Беларусі ёсць чым ганарыцца, у нас рады гасцям

21 мая на Дзятлаўшчыне прайшоў Адзіны дзень інфармавання з удзелам некалькіх інфармацыйна-прапагандысцкіх груп. Група старшыні райвыканкама Андрэя Садоўскага выступіла перад калектывамі ўпраўлення па працы, занятасці і сацыяльнай абароне райвыканкама і Цэнтра сацыяльнага абслугоўвання насельніцтва Дзятлаўскага раёна, абласная з удзелам начальніка галоўнага кантрольна-аналітычнага ўпраўлення Гродзенскага аблвыканкама Дзмітрыя Паўлоўскага і намесніка начальніка галоўнага ўпраўлення землеўпарадкавання Гродзенскага аблвыканкама Дзяніса Купрыяновіча – перад педагогамі Новаяльнянскай сярэдняй школы, з супрацоўнікамі раённага аддзела Следчага камітэта сустракалася група старшыні раённага Савета дэпутатаў Аляксандра Бараноўскага, таксама яна выступіла перад работнікамі Вензавецкай базавай школы і Вензавецкага сельвыканкама, функцыянавалі групы намеснікаў старшыні райвыканкама.

Абмеркавалі тэму “Трэнды і новыя кірункі развіцця турызму ў Беларусі”. Развіццё туріндустрыі – адзін з прыярытэтаў бягучай пяцігодкі, бо гэта галіна – магутны драйвер эканамічнага росту для любой дзяржавы. Яна спрыяе павелічэнню ўнутранага валавога прадукта, стварэнню новых працоўных месцаў і развіццю інфраструктуры, а таксама забяспечвае прыток замежнай валюты, стымулюе развіццё сумежных галінаў эканомікі. Не менш важная роля турызму ў захаванні гістарычнай спадчыны, прыродных і культурных каштоўнасцяў. Па ацэнках сусветнай турысцкай арганізацыі ААН, турызм забяспечвае каля 10 % сусветнага УВП, займае адно з вядучых месцаў у міжнародным гандлі паслугамі і спрыяе занятасці кожнага дзясятага работніка на планеце. 

У Беларусі турызм разглядаецца як стратэгічна важны сектар эканомікі, уклад якога ў УВП краіны складае 2 %, а да 2030 года стаіць задача павялічыць лічбу, як мінімум, да 5 %. Для гэтага ёсць усе магчымасці: старажытныя лясныя масівы, дубровы, багатыя паляўнічыя і рыбалоўныя ўгоддзі, азёры, аб’екты гістарычнай і архітэктурнай каштоўнасці. Цяпер унутраны турызм з’яўляецца абсалютным лідарам па колькасці паездак: у 2025 годзе экскурсантамі сталі 2,21 мільёна чалавек. Расійская Федэрацыя забяспечвае 98 % уязнога турыстычнага патоку. Назіраецца ўстойлівы рост аграэкатурызму, аднак санаторыі Беларусі застаюцца ключавой экспартнай “кропкай” галіны. У Дзяржаўнай праграме “Турызм” на 2026-2030 гады акцэнт зроблены на некалькіх пазіцыях: развіцці інфраструктуры, павышэнні якасці паслуг, падтрымцы рэгіянальных ініцыятыў, папулярызацыі Беларусі за мяжой і пашырэнні турыстычнай геаграфіі ўнутры краіны. Для гэтага мяркуецца рэалізаваць 145 інвестыцыйных праектаў з агульным фінансаваннем 1,7 мільярда рублёў.

Унікальная гісторыка-культурная спадчына дазваляе актыўна развіваць гісторыка-культурны турызм. Наша краіна шматканфесійная, дзе захавалася незвычайная храмавая архітэктура, што спрыяе рэлігійнаму турызму. Дынамічна развіваюцца і карыстаюцца попытам падзейны і прамысловы віды турызму. Сярод галоўных вартасцяў адпачынку ў рэспубліцы – магчымасць спалучыць яго з кваліфікаваным лячэннем, як вынік – пашырэнне папулярнасці аздараўленчага і лячэбнага турызму. Чыстая экалогія і непаўторны вясковы каларыт усё часцей прывабліваюць наведвальнікаў аграэкасядзібаў. На Дзятлаўшчыне сядзібы функцыянуюць у вёсках Цяцейкі, Накрышкі, Кашкалы. Запатрабаваны ў раёне актыўны турызм, а канкрэтна – тры байдарачныя сплавы па асноўных водных артэрыях Дзятлаўшчыны, рэках Нёман, Моўчадзь, Шчара.

Для далейшага развіцця турыстычнай галіны ў Беларусі яшчэ застаецца значны патэнцыял: сфера ўсё больш пераходзіць да нестандартных формаў адпачынку, рухаецца шляхам павышэння якасці і даступнасці паслуг. Па выніках 2025 года наша краіна сярод іншых у СНД уваходзіць у тройку лідараў па індэксе ўстойлівага развіцця турызму.

Як даручыў Прэзідэнт Беларусі Аляксандр Лукашэнка, задача на бягучую пяцігодку – зрабіць турызм нацыянальным праектам. Адкрыць свету нашу гісторыю, культуру, мову. За шматвекавое існаванне наша краіна набыла непаўторны нацыянальны каларыт, нам ёсць чым ганарыцца і мы заўжды рады гасцям. 

– Яшчэ дзесяць гадоў таму турыстычная сфера ў Беларусі была не настолькі папулярнай, аднак з цягам часу гістарычныя аб’екты нашай Радзімы абнаўляюцца і прывабліваюць усё больш гасцей, – падкрэсліў кіраўнік раёна Андрэй Садоўскі. – Жамчужынамі з’яўляюцца гарады Полацк, Пінск, прычым апошні па статыстыцы за 2025 год наведала найбольшая колькасць турыстаў. Брэнды нашай краіны – гэта парадак і чысціня, культура, сфера грамадскага харчавання, вельмі развіты санаторна-курортны турызм. Калі спыняцца не толькі на санаторыях, то на Дзятлаўшчыне распрацаваны чатырнаццаць маршрутаў, сярод якіх патрыятычныя і рэлігійныя. У нашым горадзе прыгожы гістарычны цэнтр і храмы, спадзяёмся на хуткае абнаўленне Палаца Радзівілаў, які набылі з аўкцыёна. Турыстычная сфера адна з прыярытэтных у бягучай пяцігодцы, і гэта правільны выбар, бо развіваюцца і сумежныя галіны эканомікі, ствараюцца новыя рабочыя месцы, прыцягваюцца грошы.

Андрэй Садоўскі заклікаў дзятлаўчан таксама не адмаўляцца ад падарожжаў як па малой радзіме, так і па Беларусі, бо вандроўкі дораць станоўчыя эмоцыі і пакідаюць добрыя ўспаміны.

Не абмінулі ўвагай у час Адзінага дня інфармавання насельніцтва такія сур’ёзныя тэмы, як супрацьдзеянне і прафілактыка злачынстваў, звязаных з замахамі на палавую недатыкальнасць і свабоду непаўналетніх, супрацьдзеянне экстрэмізму як пагрозе нацыянальнай бяспекі, прафілактыка гэтай негатыўнай з’явы ў моладзевым асяроддзі. Былі ўзняты папулярныя ў сезон адпускоў і канікулаў тэмы бяспекі на вадзе, адказнасці бацькоў за дзяцей, лясных і тарфяных пажараў. 

Падводзячы вынікі сустрэчы, Андрэй Садоўскі заклікаў дарослых летам надаць максімум увагі карыснай занятасці непаўналетніх, каб свавольствы дзяцей не прывялі да бяды. Спыніўся ён таксама на будаўнічых работах і развіцці інфраструктуры нашага раёна, расказаў, што да верасня ў Дзятлаве мяркуецца завяршыць рамонт басейна, да канца жніўня – выканаць рамонт спальнага корпуса былой школы-інтэрната, які пераўтворыцца ў арэнднае жыллё з 31-й кватэрай. Цяпер вядзецца капітальны рамонт шасці шматпавярховых дамоў. У райцэнтры яшчэ плануецца асфальтаванне вуліц і іх частак па Чырвонаармейскай, Фрунзэ, Будаўнікоў, Чапаева (каля ФОКа), Прытыцкага (пашырыць), Горкага, Дзяржынскага, Першамайскай, Савецкай (частка). У вёсцы Руда Яварская мяркуецца ўзвесці модульны ФАП, такі ж, як у Ахонава. Да новага навучальнага года будуць адрамантаваны навучальныя ўстановы, больш маштабныя работы (рамонт фасада з адваротнага боку) чакаюцца ў гімназіі № 1 горада Дзятлава. Што тычыцца сельскіх дарог, то цяпер вядуцца работы на ўчастку ад аграгарадка Войневічы да Вялікіх Шастакоў і мяжы са Слонімскім раёнам, у гэтым годзе мяркуецца таксама заасфальтаваць участак ад Вялікіх Шастакоў да вёскі Пруд.    

Ірына СТЫРНІК
Фота Ірыны СТЫРНІК, Наталлі АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае