Ад пытанняў бяспекі да якасці аказання дзяржаўных паслугаў

10 студзеня з рабочым візітам Дзятлаўшчыну наведаў міністр юстыцыі Рэспублікі Беларусь Сяргей Хаменка.

У рамках рабочай паездкі ў нашым раёне Сяргей Мікалаевіч сустрэўся са старшынёй раённага выканаўчага камітэта Андрэем Садоўскім і азнаёміўся з работай арганізацый, якія ўваходзяць у сістэму Міністэрства юстыцыі.

Кіраўнік раёна расказаў Сяргею Хаменку пра Дзятлаўшчыну, яе асаблівасці, найбольш вядомыя ўстановы і арганізацыі, не абышоў увагай папулярныя здраўніцы – санаторыі “Радон” і “Альфа Радон”.

З начальнікам галоўнага ўпраўлення юстыцыі Гродзенскага аблвыканкама Аленай Юргель, яе намеснікам Вольгай Рудай госці накіраваліся ва ўстановы райцэнтра, якія прадстаўляюць сферу. Пра дзейнасць службы “адно акно” Дзятлаўскага райвыканкама гасцям расказалі спецыялісты Станіслава Ганчар і Аксана Вырко. Яны спыніліся на тым, як у раёне папулярызуюць аказанне дзяржаўных паслугаў сярод насельніцтва, у тым ліку прадэманстравалі спецыяльна створаны для гэтага тэматычны відэаролік. У час размовы кіраўнік міністэрства акцэнтаваў увагу на важнасці работы з людзьмі і аказанні ім якаснай прававой дапамогі.

Наступным прыпынкам быў аддзел ЗАГС Дзятлаўскага райвыканкама. З яго работай і тым, як тут вядуцца адміністрацыйныя працэдуры, прысутных азнаёмілі начальнік аддзела Кацярына Ваніслаўчык і галоўны спецыяліст Святлана Вінакурава. Сяргей Хаменка пацікавіўся ў работніц, наколькі хутка ажыццяўляецца лічбавізацыя актаў грамадзянскага стану, якія пакуль захоўваюцца толькі на папяровых носьбітах. Як аказалася, адлічбавана ўжо 10 % такіх дакументаў, з якіх 1 % — за мінулы год.

У зале для ўрачыстасцяў гасцям паказалі новую абстаноўку, расказалі, наколькі запатрабавана ў дзятлаўчан святочная рэгістрацыя. Адзначылі,  што жадаючых правесці цырымонію ў  фармаце выязной рэгістрацыі шлюбу пакуль не вельмі шмат.

Аб аказанні натарыяльных паслугаў і рабоце сваёй службы гасцям расказала натарыус Гродзенскай натарыяльнай акругі Жанна Сёмуха.

У памяшканнях, дзе захоўваюцца архіўныя фонды ЗАГСа і натарыята, кіраўніка ведамства цікавіла, наколькі яны надзейныя і абароненыя ад знешніх фактараў, у тым ліку ад пажараў.

Наступнымі на маршруце былі суд і юрыдычная кансультацыя Дзятлаўскага раёна, якія знаходзяцца ў адным будынку. Гэту перавагу міністр юстыцыі адзначыў станоўча, бо людзям, якія звяртаюцца ў адно з гэтых ведамстваў, часта даводзіцца карыстацца паслугамі яшчэ і другога.

Старшыня суда Дзятлаўскага раёна Вадзім Дуброўскі правёў гасцей па кабінетах свайго ведамства і паказаў дзве судовыя залы, расказаў, як арганізавана бяспека пры разглядзе крымінальных справаў, якія новыя тэхналогіі дапамагаюць у судовай вытворчасці.

З якімі праблемамі сутыкаюцца жыхары Дзятлаўшчыны і як яны вырашаюцца, расказала адвакат Эдзіта Перажок.

У аддзеле прымусовага выканання Дзятлаўскага раёна абмеркавалі, як удаецца трымаць высокую планку па спагнанні грашовых сродкаў у рамках выканаўчай вытворчасці, наколькі цесна наладжана ўзаемадзеянне службы з пракуратурай і раённым аддзелам міліцыі, як забяспечваецца бяспека судовых выканаўцаў.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga