Абарона Радзімы – справа сапраўдных мужчын

Пра тое, як служыцца нашым землякам ва Узброеных Сілах Рэспублікі Беларусь, не адзін раз друкавалася на старонках газеты “Перамога”.

Прадоўжым добрую традыцыю. Герой гэтай публікацыі – гвардыі радавы Яраслаў Дабрук, які служыць у горадзе Слоніме ў 11-й асобнай гвардзейскай механізаванай брыгадзе ў інжынерна-сапёрным батальёне.

Нарадзіўся і вырас Яраслаў у аграгарадку Круцілавічы. З ранняга дзяцінства яго цікавіла тэхніка, таму, пасля заканчэння мясцовай сярэдняй школы, ён не задумваючыся вырашыў паступаць у Жыровіцкі аграрна-тэхнічны каледж на спецыяльнасць “тэхнік-механік”. Пасля яго заканчэння на дасягнутым не спыніўся – вырашыў яшчэ больш паглыбіць свае веды па спецыяльнасці і паступіў у БНТУ на спецыяльнасць “інжынер-механік”.

Калі надышоў час выконваць свой воінскі абавязак, Яраслаў узяў акадэмічны водпуск ва ўніверсітэце і акунуўся ў армейскія будні.

Служба ў арміі юнака не палохала, бо ведаў, што трапіць у знаёмае яму злучэнне, бо ў час вучобы ў каледжы са сваімі аднакурснікамі часта наведвалі механізаваную брыгаду ў Слоніме, дзе праходзілі заняткі па дапрызыўнай падрыхтоўцы. Шмат з армейскага жыцця яму расказаў і старэйшы брат Аляксандр, які сам нядаўна дастойна выконваў свой воінскі абавязак.

Яраслаў хутка асвоіў ваенную спецыяльнасць, дасканала авалодаў даручанай зброяй і тэхнікай, не раз паспеў праявіць сябе і на кантрольных занятках, і на палявых выхадах. Яго саслужыўцы адзначаюць, што заўсёды могуць разлічваць на дапамогу юнака і словам, і справай.

З першых дзён службы Яраслава Дабрука адрознівалі дысцыплінаванасць, добрасумленнасць і адказнасць за даручаную справу. Па выніках кантрольных заняткаў па баявой падрыхтоўцы гвардзеец атрымлівае толькі добрыя і выдатныя адзнакі.

– За час службы ў арміі я перагледзеў свае жыццёвыя каштоўнасці. Памянялася маё стаўленне да сваёй сям’і, стаў больш сур’ёзны, – распавёў Яраслаў.

У арміі заўсёды ёсць час для самаадукацыі і хобі. У вольны час юнак наведвае спартыўную залу і бібліятэку. Асаблівае месца ў жыцці Яраслава займае аўтамабільная тэхніка. Ён вельмі любіць рамантаваць механічныя транспартныя сродкі, а пераняў ён гэтыя навыкі ад бацькі і дзядулі.

– Цяпер чытаю шмат літаратуры і ўдасканальваю свае веды па тэме аўтамабіляў на камп’ютарным блоку кіравання. Пасля службы планую давучыцца і пачаць працаваць па спецыяльнасці, – дзеліцца хлопец.

Дома маладога байца з нецярпеннем чакаюць бацькі – Уладзімір Сцяпанавіч і Алена Арсеньеўна.

– Прыйшоўшы дадому, у першую чаргу, сустрэнуся са сваімі роднымі і блізкімі. Для мамы абавязкова зраблю сюрпрыз, – прызнаўся Яраслаў.

Зусім хутка гвардыі радавы Яраслаў Дабрук пераступіць вароты КПП і вернецца на малую радзіму мужным, моцным, сапраўдным мужчынам і абаронцам Айчыны. Абарона Радзімы – справа для сапраўдных мужчын, якая патрабуе высокага прафесіяналізму і стойкасці духу.

Кацярына ЯНУШЭВІЧ

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga