Аб выкананні заканадаўства рознічнага гандлю насеннем сельгасраслін

Дзятлаўская раённая дзяржаўная інспекцыя па насенняводстве, каранціне і абароне раслін інфармуе суб’ектаў гаспадарання, якія ажыццяўляюць рознічны гандаль насеннем сельскагаспадарчых раслін, уключаючы пасадачны матэрыял пладовых, ягадных раслін, аб неабходнасці выканання заканадаўства ў галіне насенняводства.

Згодна з артыкулам 16 Закона Рэспублікі Беларусь №102-З ад 7 мая 2021 года “Аб селекцыі і насенняводстве сельскагаспадарчых раслін” гатункавыя якасці насення пацвярджаюцца актам апрабацыі сельскагаспадарчых раслін; пасяўныя – пасведчаннем аб якасці насення.

Пры рэалізацыі такога насення (уключаючы пасадачны матэрыял):

— вырабленага ў Рэспубліцы Беларусь, а таксама ўвезенага ў рэспубліку з тэрыторыі дзяржавы, якая не з’яўляецца членам Еўразійскага эканамічнага саюза, звесткі аб гатункавых і пасяўных якасцях пацвярджаюцца дакументамі, выдадзенымі ў адпаведнасці з заканадаўствам Рэспублікі Беларусь;

— увезенага ў Рэспубліку Беларусь з тэрыторыі дзяржавы – члена Еўразійскага эканамічнага саюза, звесткі аб гатункавых і пасяўных якасцях гэтага насення пацвярджаюцца дакументамі, выдадзенымі дзяржавай – членам ЕЭС, па пераліку, зацверджаным Еўразійскай эканамічнай камісіяй. У выпадку частковай рэалізацыі партыі насення сельскагаспадарчых раслін, увезеных у Рэспубліку Беларусь з тэрыторыі дзяржавы – члена ЕЭС, набытчыку насення сельскагаспадарчых раслін, асобам, якія ажыццяўляюць рэалізацыю такога насення ў Рэспубліцы Беларусь, выдаюцца завераныя копіі дакументаў, выдадзеных дзяржавай – членам Еўразійскага эканамічнага саюза.

Купленае насенне суправаджаецца пасведчаннем на насенне сельскагаспадарчых раслін.

Даведка: згодна з артыкулам 24 Закона, пасведчанне на насенне сельскагаспадарчых раслін з’яўляецца дакументам, які пацвярджае гатункавыя і пасяўныя якасці насення раслін, у тым ліку ўвезенага ў Рэспубліку Беларусь, які выдаецца (пры неабходнасці) прадаўцом пры рэалізацыі іх набытчыку.

Форма пасведчання на насенне сельскагаспадарчых раслін, а таксама парадак афармлення павінны адпавядаць патрабаванням, устаноўленым пастановай Міністэрства сельскай гаспадаркі і харчавання Рэспублікі Беларусь ад 29.06.2021 г. № 47.

За парушэнне закона прадугледжана адміністрацыйная адказнасць па артыкуле 16.39 КоАП Рэспублікі Беларусь.

Ілона ВАРАБЕЙ,
вядучы аграном

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#АПК #сельское хозяйство