Нядаўна ў нашай краіне асобна пачала працаваць экспертна-крыміналістычная служба, якая раней уваходзіла ў склад тэрытарыяльных аддзелаў міліцыі. Цяпер крыміналістычнымі экспертызамі займаецца Дзяржаўны камітэт судовых экспертызаў Рэспублікі Беларусь, які таксама мае рэгіянальныя аддзелы. Адзін з такіх аддзелаў — Слонімскі міжраённы — абслугоўвае ў тым ліку і тэрыторыю Дзятлаўскага раёна.
Пра спецыфіку работы экспертаў-крыміналістаў, пра тое, якую цікавасць яна ўяўляе для простых людзей, карэспандэнтка газеты гутарыла з начальнікам Слонімскага міжраённага аддзела Дзяржаўнага камітэта судовых экспертызаў Рэспублікі Беларусь падпалкоўнікам юстыцыі С. Я. Дарыпапам.
— Сяргей Яўгенавіч, што сабой уяўляе ваш аддзел?
— Ён быў сфарміраваны з супрацоўнікаў экспертна-крыміналістычных падраздзяленняў аддзелаў унутраных спраў Слонімскага і Дзятлаўскага райвыканкамаў, а таксама з супрацоўнікаў Слонімскага і Дзятлаўскага міжраённых аддзяленняў Упраўлення па Гродзенскай вобласці дзяржаўнай службы медыцынскіх судовых экспертызаў. У структуру аддзела ўваходзяць экспертна-крыміналістычныя сектары і аддзел медыцынскіх судовых экспертызаў. Думаю, варта крыху падрабязней расказаць і пра іх.
Экспертна-крыміналістычны сектар па Слонімскім раёне знаходзіцца ў будынку Слонімскага райаддзела міліцыі. Тут праводзяць такія экспертызы, як дактыласкапічная, трасалагічная, балістычная, почырказнаўчая, партрэтная, аўтатэхнічная, экспертызы халоднай зброі, тэхнічныя экспертызы дакументаў, экспертызы наркатычных сродкаў і псіхатропных рэчываў. На некалькі відаў менш экспертызаў праводзяць у экспертна-крыміналістычным сектары па Дзятлаўскім раёне, размешчаным у будынку Дзятлаўскага райаддзела міліцыі: дактыласкапічную, трасалагічную, балістычную, почырказнаўчую і экспертызу халоднай зброі. Тут працуюць старшы эксперт, маёр юстыцыі Мікалай Мікалаевіч Мікуліч (працоўны стаж 10 гадоў) і вядучы судовы эксперт Герман Анатольевіч Касянкоў (працоўны стаж 19 гадоў).
Аддзел медыцынскіх судовых экспертызаў таксама ўключае ў сябе некалькі сектараў: сектар судова-медыцынскіх экспертызаў па Слонімскім раёне, сектар судова-медыцынскіх экспертызаў па Дзятлаўскім раёне і сектар судова-псіхіятрычных экспертызаў.
— Раскажыце, чым займаюцца эксперты экспертна-крыміналістычнага сектара па Дзятлаўскім раёне?
— У сярэднім за год яны аглядаюць каля 20 месцаў задарэнняў. Адшукваюць і збіраюць «сляды», якія пакінулі злачынцы. Такія знаходкі дапамагаюць ім з дапамогай крыміналістычных базаў даных і ўлікаў раскрыць дзясяткі злачынстваў.
— А чым гэтыя структуры могуць зацікавіць звычайных людзей?
— З ліпеня 2014 года ў грамадзян і юрыдычных асобаў з’явілася магчымасць звяртацца ў падраздзяленні Дзяржаўнага камітэта судовых экспертызаў, каб правесці экспертныя даследаванні на платнай аснове. Цяпер жадаючыя могуць самастойна, без прыцягнення праваахоўных органаў, напісаць заяву і атрымаць адказы на хвалюючыя пытанні, у тым ліку і ў Слонімскім міжраённым аддзеле ДКСЭ. Атрыманыя вынікі выдаюцца ў форме даведкі эксперта. Тэлефоны для кансультацый: 8-01562-5-50-95 (у Слоніме), 2-52-37 (у Дзятлаве).
— З якімі заявамі найчасцей звяртаюцца людзі?
— Найбольшай папулярнасцю карыстаецца аўтатэхнічная экспертыза. Яно і зразумела, машына сёння ёсць амаль у кожнай сям’і, а на дарозе можа здарыцца ўсякае.
— І якія магчымасці аўтатэхнічнай экспертызы?
— Эксперты змогуць высветліць, ці меў аўтамабіль няспраўнасці на момант аварыі, разбяруцца ва ўсіх акалічнасцях і назавуць сапраўдную прычыну здарэння. Шырокія магчымасці ў экспертаў і ў высвятленні таго, рухалася машына або стаяла ў момант нанясення ёй тэхнічных пашкоджанняў, або ці была ўчынена аварыя канкрэтным аўтамабілем.
Не менш важна высветліць, ці была ў вадзіцеля тэхнічная магчымасць папярэдзіць аварыю. Спецыяльныя разлікі дапамагаюць даведацца, ці мог вадзіцель спыніць свой транспартны сродак у канкрэтных дарожных умовах з моманту ўзнікнення небяспекі, высветліць, ці была ў яго дзеяннях неадпаведнасць патрабаванням правілаў дарожнага руху.
— Што можаце параіць людзям, якія яшчэ сумняваюцца ў магчымасцях экспертаў-крыміналістаў?
— Магчымасці сучасных экспертаў-крыміналістаў вельмі вялікія. У пераважнай большасці выпадкаў спецыяліст установіць усе акалічнасці здарэння. Таму не варта слухаць «добразычліўцаў» і спрабаваць падмануць следчага, інспектара, эксперта — гэта не пазбавіць вінаватага ад адказнасці, а толькі павялічыць працоўныя затраты, затраты часу на расследаванне і правядзенне экспертызы.
Гутарыла І. СТЫРНІК
