Віншаванні перадавікоў жніва-2019 сталі добрай традыцыяй у Дзятлаўскім раёне.
На гэты раз працоўную перамогу атрымаў вадзіцель КСУП “Слава працы” Аляксандр Гародка. На аўтамабіле “МАЗ” ён перавёз ад камбайнаў 1 100 тон зерня.
За рулём аўтамабіля ў сваёй гаспадарцы Аляксандр Антонавіч 28 гадоў. Машыну адчувае і абслугоўвае своечасова. Адказны, добрасумленны, настойлівы, добры работнік, які заўсёды працуе з настроем. А ад аператыўнасці і акуратнасці вадзіцеля ў многім залежыць вынік агульнай працы.
Словы ўдзячнасці і віншаванні выказалі працаўніку кіраўнік па вытворчасці Віталь Дула, старшыня прафсаюзнага камітэта КСУП “Слава працы” Людвіг Пякарскі. Першаму тысячніку гаспадаркі яны ўручылі каштоўныя падарункі.
У гонар Аляксандра Гародкі і ўсіх працаўнікоў хлебнай нівы прагучалі песні ў выкананні работнікаў Казлоўшчынскага дома культуры.
Вольга ЮШКЕВІЧ
