У Жукоўшчынскім сельвыканкаме пад кіраўніцтвам намесніка старшыні райвыканкама Вадзіма Бяляткі прайшло чарговае пасяджэнне грамадскага пункта аховы правапарадку, сумешчанае з кірмашом вакансій для грамадзян, не занятых у эканоміцы. У ім прынялі ўдзел супрацоўнікі ўпраўлення па працы, занятасці і сацыяльнай абароне райвыканкама, зацікаўленыя наймальнікі, прадстаўнікі мясцовага сельвыканкама.
На сустрэчу запрасілі асоб, якія злоўжываюць спіртнымі напіткамі і ўчынілі адміністрацыйныя правапарушэнні, сямейных скандалістаў, беспрацоўных. Гэтым разам прыйшлі дзесяць грамадзян, з імі правялі прафілактычную гутарку, у час якой заклікалі працаваць, не дапускаць супрацьпраўных дзеянняў. Яны ўзяты на кантроль аддзелам унутраных спраў, кіраўніцтвам КСУП “Жукоўшчына”, беспрацоўным прапанавана работа па месцы жыхарства.
Амаль усе з запрошаных такога ўзросту, што маюць сілы і здароўе працаваць, але перашкодай гэтаму з’яўляецца ўсё адна і тая ж прычына – злоўжыванне алкаголем. На пасяджэнні ўжо каторы раз імкнуліся разабрацца, як жа справіцца з гэтай праблемай? Дарэчы, многія з іх добрыя спецыялісты, старшыня мясцовага сельгаспрадпрыемства гаворыць, што нармальна працуюць, але да першай чаркі. Сумна, што сярод іх ёсць і жанчыны.
Вадзім Бялятка заўважыў, што калі такія грамадзяне не змогуць самастойна ўзяць сябе ў рукі, іх прыйдзецца прымусова “перавыхоўваць”:
– Тое, што вы злоўжываеце алкаголем, ні да чаго добрага не прывядзе. Хто не перастане піць і не працаўладкуецца, пойдзе ў лячэбна-працоўны прафілакторый. Іншыя варыянты тут, верагодна, не падыдуць. Якая будучыня вас чакае? Няўжо не сорамна перад сваімі сем’ямі, не хочацца жыць спакойна, атрымліваць сумленна заробленыя грошы і быць упэўненым, што ў старасці не застанешся без пенсіі? Задумайцеся, пакуль зусім не позна.
Усе абяцаюць выправіцца, працаваць. Можна ім верыць, ці на наступнае пасяджэнне зноў будуць запрошаны?
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
