Пра гэта паведаміла карэспандэнту БЕЛТА намеснік начальніка службы метэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.
“Першая палова тыдня парадавала цяплом і сонцам. Уначы месцамі па поўначы краіны крыху падмарожвала, але ўдзень красавіцкае сонца прагравала паветра. Аднак надвор’е не вызначаецца стабільнасцю. І ў чацвер тэрыторыя Беларусі апынулася пад уплывам франтальнага раздзелу. У пятніцу атмасферны фронт перамясціўся на ўсход краіны, у Беларусь пачалі паступаць паветраныя масы з Заходняй Еўропы”, – адзначыла Святлана Рыбакова.
У нядзелю, 9 красавіка, з Заходняй Еўропы на большую частку тэрыторыі Беларусі распаўсюдзіць уплыў вобласць павышанага атмасфернага ціску, таму будзе ў асноўным без ападкаў. Тэмпература паветра ўдзень будзе 6-12 вышэй за нуль. Па паўднёвым захадзе будзе цяплей – удзень паветра прагрэецца да 15 градусаў.
У панядзелак чакаецца цёплае, пераважна без ападкаў надвор’е. Ноччу і раніцай магчымы слабы туман. Тэмпература паветра ўначы складзе ад мінус 1 да плюс 6 градусаў. Удзень будзе 10-17 вышэй за нуль, па паўднёвым захадзе паветра прагрэецца да 21 цяпла.
У аўторак, 11 красавіка, ноччу большая частка краіны застанецца ў вобласці павышанага атмасфернага ціску, днём надвор’е будзе вызначаць атмасферны фронт, які перамяшчаецца з паўночнага захаду на паўднёвы ўсход, таму ўначы ў крайніх паўночна-заходніх раёнах, удзень на большай частцы тэрыторыі рэспублікі чакаюцца кароткачасовыя дажджы, днём па паўднёвым усходзе магчымы навальніцы. Тэмпература паветра ноччу будзе 2-9 градусаў, удзень – ад 8 да 15 цяпла, па паўднёвым усходзе паветра прагрэецца да 20 градусаў вышэй за нуль.
