Землякі віншуюць

Галіна Іванаўна ХІЛІМОНЧЫК, намеснік дырэктара па выхаваўчай рабоце Казлоўшчынскай сярэдняй школы:

— Ужо зусім хутка наступіць новы, 2019 год. Усім сваім землякам, калегам, родным і проста знаёмым хачу пажадаць у новым годзе ўсяго толькі самага найлепшага. Няхай ва ўсіх сем’ях пануюць толькі мір, узаемаразуменне, пяшчота і дабрыня. Здароўя ўсім, поспехаў і аптымізму.

А наша школа да святаў таксама рыхтуецца, і ўжо даўно. Я лічу, што мы вельмі дастойна ўпрыгожылі нашу ўстанову, і гэта будзе ацэнена на раённым конкурсе. Шмат ідэй і намаганняў прыклалі нашы педагогі, усе былі актыўныя і крэатыўныя. Ёсць у нас і прыгожыя фотазоны, дзе дзеткі з бацькамі могуць сфатаграфавацца.

У акцыі “Нашы дзеці” мы таксама прымаем самы актыўны ўдзел. Праводзім навагоднія святы для навучэнцаў, прадстаўленні сёлета незвычайныя, дзеці старанна рыхтаваліся. Прыходзяць на святы і бацькі.

Як заўсёды, будзем адзначаць зімовыя святы і дома, са сваімі роднымі, сябрамі, будзем сустракацца на мерапрыемствах у пасёлку. Нашы работнікі культуры заўжды рыхтуюць цікавую праграму, сёлета таксама чакаем сюрпрызаў.