Залаты мяч – зорная перамога

Цырымонія закрыцця футбольнага сезона “Залаты мяч – 2018” прайшла ў канцэртнай зале Prime Hall у Мінску. На ўрачыстым мерапрыемстве ўпершыню адзначана зорная перамога Дзятлаўскай ДЮСШ.

У традыцыйным мерапрыемстве прынялі ўдзел прадстаўнікі шматлікіх клубаў беларускіх ліг, члены выканаўчага камітэта АБФФ, спонсары і партнёры Федэрацыі, а таксама ветэраны беларускага футбола.

У час урачыстасці былі падведзены вынікі футбольнага сезона, абвешчаны сімвалічныя зборныя, лепшыя клубы ў разнастайных намінацыях і наймацнейшыя ігракі на кожнай з пазіцый, уручаны ўзнагароды ў камандных і індывідуальных намінацыях.

Галоўнай інтрыгай вечара для прадстаўнікоў Дзятлаўскага раёна стала ўручэнне ўзнагароды за развіццё масавага футбола трэнеру-выкладчыку па футболе Дзятлаўскай ДЮСШ Уладзіміру Ганчару.

“Зорны мяч”  за развіццё масавага футбола яму ўручыў міністр спорту Сяргей Кавальчук.

За актыўную плённую працу ў галіне футбола па развіцці спартыўнага таленту моладзі, распрацоўку і развіццё аўтарскага праекта Асацыяцыя БФФ адзначыла дыпломам пераможцы конкурсу праектаў па масавым футболе аўтарскі праект  Уладзіміра Ганчара “Футбол у вёсцы”, які сёлета быў рэалізаваны на тэрыторыі нашага раёна.

– Для мяне гэта вельмі важная ўзнагарода, – адзначыў у час цырымоніі Уладзімір Ганчар. – Футбол – гэта маё жыццё. Акрамя дзяцей, я займаюся яшчэ і з дарослай камандай, праводжу міні-футбольныя матчы, і мне вельмі прыемна, што гэтыя намаганні заўважылі і ацанілі нароўні з заслугамі нашых вядучых ігракоў і трэнераў. Паспрабую ў наступным годзе парадаваць і здзівіць якім-небудзь новым праектам.

Віншаванні, падзякі і падарункі за актыўную і плённую работу Уладзімір Ганчар атрымаў ад начальніка аддзела адукацыі Дзятлаўскага райвыканкама Наталлі Белаус.

Аксана АНДАЛЮКЕВІЧ