З 25-годдзем прыёмнага мацярынства, Людміла Асіпук!

У гімназіі № 1 горада Дзятлава ў рамках метадычнага аб’яднання прыёмных бацькоў, бацькоў-выхавальнікаў, апекуноў адбылося ўрачыстае ўшанаванне прыёмнай матулі нашага раёна Людмілы Асіпук, якая прысвяціла замяшчальнаму бацькоўству 25 гадоў свайго жыцця, выгадавала 8 усынаўлёных і 22 прыёмныя дзіцяці.

Са словамі шчырай удзячнасці да юбіляркі па самай высакароднай у свеце прафесіі і прысутных звярнулася начальнік аддзела адукацыі райвыканкама Марына Лашкоўская:  

– Паважаныя бацькі, вы тыя людзі, якія ў цяжкі момант падставілі надзейнае плячо, працягнулі руку дапамогі дзецям і сёння любіце іх, аберагаеце, выхоўваеце як родных. Вы гэта робіце з гонарам і годнасцю. У раёне 32 дзіцяці-сіроты. Яны гадуюцца ў розных сем’ях: на Дзятлаўшчыне ёсць дом сямейнага тыпу, дзе растуць восем такіх непаўналетніх, функцыянуюць прыёмныя і апякунскія сем’і.   

Сярод вас на гэтым мерапрыемстве прысутнічае матуля, якая ўжо 25 гадоў займаецца такой важнай справай. 1 лютага 2001 года на работу ў аддзел адукацыі райвыканкама была прынята Людміла Асіпук. Чвэрць стагоддзя – значны стаж, і гэтыя гады Людміла Мікалаеўна аддала закліку сваёй душы – выхаванню дзяцей.

Марына Яўгеньеўна шчыра падзякавала матулі за клопаты і любоў да дзяцей-сірот і дзяцей, якія засталіся без апекі бацькоў, пажадала ўсіх зямных шчадрот, моцнага здароўя, працвітання і каб удача, поспех і прызнанне былі пастаяннымі спадарожнікамі на жыццёвым шляху.

Яна ўручыла юбілярцы па прафесіі падзяку аддзела адукацыі райвыканкама і кветкі.

Да віншаванняў з падарункам ад раённага аддзялення ГА “Беларускі дзіцячы фонд” далучылася яго старшыня, галоўны спецыяліст аддзела адукацыі райвыканкама Алена Чайкоўская:

– Віншуем вас з гэтым годным юбілеем. Мацярынства – заўжды подзвіг, а прыёмнае мацярынства – подзвіг двайны, бо выгадаваць дзяцей-сірот і тых, хто застаўся без апекі бацькоў, падарыць ім любоў, якой да гэтага ніхто іх не ахінаў, сагрэць сваім цяплом, даць пуцёўку ў жыццё – самая высакародная справа на Зямлі. Няхай і ваша сэрца заўжды будзе сагрэта шчасцем і радасцю.

Дружнымі апладысментамі Людмілу Мікалаеўну падтрымалі і яе калегі – замяшчальныя бацькі раёна.

Ірына СТЫРНІК           

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае  #Годбелорусскойженщины