Яшчур – рызыка існуе

Гэта вірусная хвароба хатніх і дзікіх парнакапытных жывёл, якая характарызуецца ліхаманкай і афтознымі паражэннямі слізістай абалонкі ротавай поласці, скуры вымя і канечнасцяў.

Часцей за ўсё хварэе буйная рагатая жывёла і свінні. Пры заражэнні яшчурам у жывёлы адзначаецца пагаршэнне апетыту, моцнае слінавыдзяленне, павышэнне тэмпературы цела да 40,5˚-41,5˚С, на ўнутранай паверхні вуснаў, ніжняй сківіцы, языку, слізістай абалонцы шчок і вымя ўтвараюцца афты, пры разрыве якіх з’яўляюцца эрозіі.

Смерць жывёл наступае праз 5-14 сутак.

Захварэць на яшчур можа і чалавек.

Асноўны шлях інфікавання людзей – праз сырое малако хворых жывёл і прадукты яго перапрацоўкі, радзей праз мяса.

Ад чалавека да чалавека інфекцыя не перадаецца. Дзеці больш успрымальныя да яшчуру, чым дарослыя.

Асноўныя меры прафілактыкі віруса яшчуру ў чалавека:

— захаванне мер асабістай засцярогі пры доглядзе, даенні, лячэнні, забоі, выкарыстанні інвентара і прадметаў догляду, заражаных выдзяленнямі хворых жывёл;

— абавязковая пастэрызацыя і кіпячэнне малака, прыгатаванне масла з апрацаваных вяршкоў.

Пры ўзнікненні падазрэння на захворванне жывёлы яшчурам уладальнік абавязаны неадкладна паведаміць аб гэтым спецыялістам дзяржаўнай ветэрынарнай службы.

Баляслаў КУЛЕШ,

галоўны ветэрынарны доктар Дзятлаўскага раёна

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga