На пытанні адказвае старшыня суда Дзятлаўскага раёна Вадзім Дуброўскі.
– Якім чынам муж і жонка могуць падзяліць нажытую ў перыяд шлюбу маёмасць?
– Каб урэгуляваць маёмасныя адносіны, муж і жонка па ўзаемнай згодзе могуць звярнуцца ў натарыяльную кантору для заключэння Шлюбнага дагавора або Пагаднення аб раздзеле маёмасці. Калі паміж імі згода не дасягнута і ўзнікла спрэчка, падзел маёмасці можа быць праведзены судом.
– Які парадак падзелу маёмасці праз суд?
– З іскавай заявай аб падзеле маёмасці могуць звярнуцца муж і жонка, у тым ліку і былыя. У заяве павінна быць пералічана маёмасць, якая нажыта імі ў перыяд шлюбу. Неабходна выплаціць дзяржаўную пошліну, якая складае 5 % ад цаны іска, але не менш за дзве базавыя велічыні. Кошт іска – гэта кошт маёмасці, на якую прэтэндуе муж (жонка), які звярнуўся з заявай аб падзеле маёмасці.
– Якая маёмасць з’яўляецца сумеснай уласнасцю мужа і жонкі і як яна дзеліцца паміж імі?
– У адпаведнасці з артыкулам Кодэкса Рэспублікі Беларусь аб шлюбе і сям’і агульнай маёмасцю мужа і жонкі, якая падлягае падзелу, з’яўляецца любая нажытая імі ў перыяд шлюбу маёмасць, незалежна ад таго, на каго яна была набыта або кім з іх унесены грашовыя сродкі. У выпадку падзелу маёмасці муж і жонка маюць роўныя правы на яе, калі Шлюбным дагаворам не прадугледжана іншае. Не мае значэння, быў адзін з іх заняты вядзеннем хатняй гаспадаркі, доглядам дзяцей і не меў самастойнага заробку. Маёмасць, якая належыць мужу ці жонцы, можа быць прызнана судом агульнай сумеснай уласнасцю, калі будзе ўстаноўлена, што ў перыяд шлюбу за кошт агульнай або асабістай маёмасці другога зроблены ўклад, які значна павялічыў кошт гэтай маёмасці (капітальны рамонт, рэканструкцыя і гэтак далей), калі іншае не прадугледжана Шлюбным дагаворам.
– Якая маёмасць не падлягае падзелу?
– Асабістая маёмасць мужа ці жонкі, якая належала ім да ўступлення ў шлюб, атрыманая ў перыяд шлюбу ў дар або ў парадку атрымання ў спадчыну, а таксама набытыя за кошт агульных сродкаў рэчы індывідуальнага карыстання, калі яны не адносяцца да прадметаў раскошы (адзенне, абутак). Таксама не падлягае падзелу маёмасць, набытая мужам ці жонкай выключна за кошт яго асабістай маёмасці, а таксама набытая пасля фактычнага спынення сямейных адносін і вядзення агульнай гаспадаркі, калі шлюб яшчэ не быў скасаваны.
– Якім чынам дзеліцца маёмасць?
– Пры падзеле маёмасці мужа і жонкі суд улічвае меркаванне і довады бакоў, вызначае, хто ў ім больш мае патрэбу, зыходзячы з усіх абставінаў справы і прадстаўленых суду доказаў.
– Што рабіць, калі муж (жонка) пасля распаду сям’і без згоды схаваў маёмасць, прадаў або іншым спосабам распарадзіўся ёй?
– Калі судом будзе дакладна ўстаноўлена, што муж ці жонка распарадзіліся маёмасцю па сваім меркаванні насуперак волі іншага і не ў інтарэсах сям’і або схавалі яе, то пры падзеле гэта маёмасць або яе кошт на дзень вынясення рашэння будзе ўлічана судом.
– У якіх выпадках суд можа адступіць ад роўнасці доляў?
– Суд мае права адступіць ад прынцыпу роўнасці доляў мужа і жонкі ў сумесна нажытай маёмасці з улікам інтарэсаў іх непаўналетніх і якія маюць патрэбу ў дапамозе непрацаздольных паўналетніх дзяцей або якія заслугоўваюць увагі інтарэсаў аднаго з бацькоў. Да іх могуць быць аднесены выпадкі, калі муж ці жонка пазбаўлены магчымасці атрымліваць даход ад працоўнай або прадпрымальніцкай дзейнасці па стане здароўя або па іншых незалежных ад іх уважлівых прычынах, а таксама калі адзін з іх без уважлівых прычын ухіляўся ад працоўнай дзейнасці, расходаваў агульную маёмасць насуперак інтарэсам сям’і.
Падрыхтавала Вольга ЮШКЕВІЧ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#суд
