Лічбавая адукаванасць у наш час такі ж важны навык выжывання, як уменне дзейнічаць у надзвычайнай сітуацыі або аказваць неадкладную дапамогу.
Для прафілактыкі інтэрнэт-злачынстваў, ахвярамі якіх могуць стаць непаўналетнія, у аздараўленча-спартыўным летніку “Алімпіец” адбылося інтэрактыўнае мерапрыемства “Як не стаць ахвярай кібервымагальніцтва?”. Яго правялі сацыяльныя педагогі сацыяльна-педагагічнага цэнтра горада Дзятлава Дзіяна Кацянкова і Іна Нічыпаровіч. Навучанне праходзіла ў фармаце захапляльнага квэсту і практычных майстар-класаў. Юныя адпачывальнікі вучыліся пазнаваць прыкметы махлярства праз аналіз скрыншотаў падазроных паведамленняў, фэйкавых сайтаў, прапановаў аб лёгкіх заробках. Разам з педагогамі яны стваралі складаныя паролі і разбіраліся, чаму даты нараджэння ці лічбы па парадку – гэта прамы шлях да ўзлому акаўнта. Праз гульню запомнілі сітуацыі, калі важна не стаць агрэсарамі або ахвярамі, і асвоілі дакладны алгарытм дзеянняў: не адказвай на правакацыі – захавай скрыншоты-доказы – раскажы даросламу.
Асобны блок сустрэчы быў прысвечаны бяспецы ў анлайн-гульнях: абмеркавалі, як не адкрыць доступ да свайго акаўнта махлярам за абяцаныя “бясплатныя спасылкі” і чаму нельга пераходзіць па спасылках ад незнаёмцаў, нават калі такія людзі здаюцца дружалюбнымі.
Напрыканцы дзеці і педагогі прыйшлі да высновы: інтэрнэт – цудоўны інструмент для навучання і адпачынку, аднак у віртуальнай прасторы заўжды трэба быць уважлівым і не губляць абачлівасці.
Падрыхтавала Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
