Вялікі летні баль “Спадчына стагоддзяў”

Яркае і відовішчнае мерапрыемства прайшло ў Мінску да 20-годдзя “алмаза ведаў”. На адкрытай пляцоўцы перад Нацыянальнай бібліятэкай Беларусі ладзіўся вялікі летні баль з сімвалічнай назвай “Спадчына стагоддзяў”.

Дзятлаўшчыну на танцавальным марафоне прадстаўлялі ўдзельнікі харэаграфічнага аб’яднання пад кіраўніцтвам Анатоля Кардаша “Эліт Данс”, а ўсяго тут сабралася каля дзесяці прафесійных і аматарскіх калектываў, якія практыкуюць гістарычныя і бальныя танцы.

Святочная праграма доўжылася на працягу пяці гадзін і завяршылася феерверкам. 

Уражаннямі ад паездкі ў сталіцу падзяліўся Анатоль Кардаш:

– Мы падтрымліваем сувязь з бальнай супольнасцю нашай краіны, Нацыянальнай бібліятэкай, таму было вельмі прыемна, калі на адрас Дзятлаўскага раённага цэнтра культуры і народнай творчасці прыйшло запрашэнне на ўдзел “Эліт Данс” у юбілейным вялікім летнім балі каля “алмаза ведаў”. На свяце наша аб’яднанне прадставілі шэсць пар. Мы танцавалі разам з калектывамі з Мінска, Гомеля, Магілёва, Бабруйска, іншых куткоў Беларусі. Паўдзельнічалі ва ўсіх аддзяленнях, з задавальненнем паслухалі канцэртныя нумары і выступленні, вялікую асалоду атрымалі, назіраючы паказ калекцыі сталічнай студыі моды ў беларускіх і лаціна-амерыканскіх матывах. Ва ўсіх жадаючых была магчымасць пабываць на экскурсіі ў бібліятэчных залах.

Падзея запомнілася спалучэннем у адным месцы вытанчанасці, элегантнасці, прыгажосці, высокага ўзроўню падрыхтоўкі, культуры, атмасферы эстэтыкі. Гэта была сустрэча добрых сяброў. Асабліва парадавала, што мерапрыемства праходзіла пад адкрытым небам і сабрала сотні гледачоў.

Прыемна, што да дзятлаўскага калектыву адносяцца як да аднаго з заснавальнікаў бальнай культуры ў Беларусі. Нас пазнаюць, мы атрымліваем шмат станоўчых водгукаў, запрашэнні. Ганарымся, што выхадцаў з невялікага горада з насельніцтвам каля васьмі тысяч чалавек клічуць на святы такога ўзроўню, ведаюць і любяць. Дарэчы, інтэрв’ю-водгук ад “Эліт Данс” узяў канал АНТ. Словам, на юбілейным свяце Нацыянальнай бібліятэкі прыемна спалучыліся ўсе фактары, якія пазітыўна ўплываюць на настрой і эмоцыі, натхняюць і матывуюць на далейшае развіццё.

У сёлетняй летняй праграме аматарскага аб’яднання “Эліт Данс” яшчэ шмат цікавых падзей. Нас чакае ўдзел у раённай урачыстасці да Дня Незалежнасці, “лавандавыя балі” на сядзібе “Вольны мельнік” у Лідскім раёне, там жа, на Лідчыне, – штогадовы кветкавы баль у сяброў з аграгарадка Бердаўка ў сядзібе Аляксандра Дзембравецкага, а таксама рэпетыцыі, экскурсіі і шмат цікавага.

Ірына СТЫРНІК
Фота ўдзельнікаў

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае