Свята Уваскрэсення Гасподняга – гэта ўрачыстасць усеагульнай радасці. Усёй гэтай радасці, здаецца, не змясціць у сваёй душы і сэрцы! Нездарма першым словам Уваскрэслага Хрыста было: “Радуйцеся!”.
У гэтыя светлыя дні Святая Царква заклікае ўсіх вернікаў радавацца: “Гэты дзень, яго ж ствары Гасподзь, узрадуемся ім, павесялімся ў ім!” Частым заклікам да радасці Святая Царква хоча абудзіць нас ад сну, пазбавіць хаця б на некаторы час ад мітусні і далучыць нас да светлай велікоднай урачыстасці.
Пачуццё радасці бярэ верх над усімі нашымі зямнымі пачуццямі. Радасць – гэта пачуццё паспяховага, пераможнага завяршэння ўсялякай добрай справы і ўсялякага намагання. Радасць – гэта перамога праўды. Радасць – гэта сімвал усяго святога і дасканалага.
Колькі Гасподзь раздае багатых сваіх дароў на працягу ўсяго нашага зямнога жыцця! І ўсё гэта – нагода для радасці: радасць у маладосці, радасць у мудрай старасці, радасць у сіле, радасць у прыгажосці, радасць у поспехах у рабоце, радасць у сямейным жыцці, радасць ад добрых справаў, радасць тады, калі мы прабачаем тым, хто пакрыўдзіў нас, радасць у малітве, радасць ад наведвання храма Божага, радасць ад сустрэчы з людзьмі, радасць ад таго, што свеціць сонца, радасць ад таго, што мы жывём!
Радасці зямныя – гэта толькі водбліск, гэта толькі прадчуванне той сапраўднай вечнай Боскай радасці. “Не бачыла таго вока, не чула таго вуха, і не прыходзіла тое на сэрца чалавеку, што прыгатаваў Бог тым, хто любіць Яго” (1 Кор. 2,9). Вось чаму першым словам Уваскрэслага Хрыста было: “Радуйцеся!”. Вось чаму арханёл Гаўрыіл, які прынёс свету добрую вестку, звяртаецца да Дзевы Марыі са словам “Радуйся!”. Вось чаму святы апостал Павел нагадвае: “Радуйцеся пра Госпада. Радуйцеся заўжды пра Госпада; і яшчэ раз кажу: радуйцеся!” (Фл. 3,1;4,4). Вось чаму радасць пра Уваскрэслага Госпада святыя апосталы пранеслі па ўсім свеце, аддаўшы за гэта жыццё. Вось чаму святыя пакутнікі і падзвіжнікі з гэтай радасцю пераможна ажыццяўлялі свой жыццёвы шлях. Вось чаму хрысціяне напоўнены пачуццём велікоднай радасці і шчасця, якое здзіўляе тых, хто не зведаў лагоды Божай і не зведаў радасці пра Госпада.
Святая Праваслаўная Царква напоўнена радасцю пра Госпада, якую шчодра раздае ўсім жадаючым. Асаблівай радасцю мы прычашчаемся ў дні Уваскрэсення Гасподняга. Яна выліваецца ва ўрачыстасць, у духоўны ўздым. Так будзе заўжды. І гэта сведчанне таго, што з намі заўжды Уваскрэслы Гасподзь – крыніца гэтай радасці.
Яшчэ раз віншую вас, браты і сёстры, са светлым Хрыстовым Уваскрэсеннем! Няхай радасць Уваскрэсення Хрыстова ўмацоўвае нашу веру ў тое, што Хрыстос сапраўды ўваскрэс, у тое, што і мы па яго прыкладзе ўваскрэснем для Вечнага Жыцця.
Мне застаецца нагадаць, што 18 красавіка, у трэці дзень Вялікадня, у Цэнтры культуры горада Дзятлава адбудзецца велікоднае прадстаўленне нядзельнай школы, якая працуе пры храме Праабражэння Гасподня горада Дзятлава. Пачнецца яно ў 18 гадзін. Прыходзьце, калі ласка!
М. ПІНЧУК,
благачынны цэркваў Дзятлаўскай акругі, настаяцель прыхода храма Праабражэння Гасподня горада Дзятлава
