Мы жывём ва ўтульных дварах, ходзім па чыстых, светлых вуліцах, п’ём чыстую ваду, маем зручнасці ва ўласных дамах і кватэрах. За ўсё гэта і многае іншае трэба падзякаваць работнікам камунальнай службы раёна, якія круглы год працуюць для роднага краю і землякоў. Напярэдадні іх прафесійнага свята дырэктар Дзятлаўскага РУП ЖКГ Васіль Пяцюк узгадаў, што было зроблена ў камунальнай сферы ў мінулым годзе і падзяліўся планамі на год цяперашні:
– Вялікая работа была праведзена ў жыллёвым фондзе раёна: мы ўвялі ў строй 9200 квадратных метраў жылля пасля капітальнага рамонту. Завершаны работы ў наступных шматкватэрных дамах у аграгарадку Гезгалы, гарпасёлках Казлоўшчына, Наваельня, горадзе Дзятлаве. Таксама шмат было зроблена па добраўпарадкаванні дваровых тэрыторый вуліц і месцаў адпачынку, гэта работа прадаўжаецца сёлета. Напрыклад, ужо ў красавіку плануем завяршыць ачыстку возера ў гарпасёлку Казлоўшчына ад донных адкладаў. Сёлета мы прадоўжым работу па капітальным рамонце жыллёвага фонду: адзін з самых вялікіх праектаў – рамонт дома № 4 А па вуліцы Навагрудскай, агульная плошча кватэр у якім складае больш за 4,5 тысячы квадратных метраў, дома № 9 па вуліцы Савецкай у Казлоўшчыне і дома № 26 па вуліцы Савецкай у Наваельні. На двух аб’ектах з трох падрадчыкам стане ўпраўленне спецыяльных работ горада Дзятлава ААТ “Будкомплекс”.
– Як склаўся ацяпляльны сезон і якімі клопатамі жывяце сёння?
– Каб ён праходзіў без сюрпрызаў, кожны раз мы грунтоўна рыхтуемся. У мінулым годзе замянілі абсталяванне на кацельні “Хвінявічы”, якая працуе ў аўтаномным рэжыме. Сёлета прыступім да рэканструкцыі кацельні “Цэнтральная” ў Дзятлаве: заменім кацёл на шчэпках на больш магутны, састарэлае абсталяванне, правядзём будаўнічыя работы. У перспектыве – замена абсталявання на кацельнях у Жукоўшчыне і Наваельні. Таксама ў мінулым годзе мы абнавілі частку напорнага калектара ў гарпасёлку Казлоўшчына ад каналізацыйнай помпавай станцыі да палёў фільтрацыі, сёлета завершым гэтыя работы. У полі нашай увагі застаецца рэканструкцыя ачышчальных збудаванняў горада Дзятлава. Праект гатовы, як толькі паступіць фінансаванне з абласнога бюджэту, пачнём яго рэалізацыю.
– Як вядома, у раёне робіцца шмат для павышэння якасці пітной вады…
– Жыхары Дзятлаўшчыны забяспечаны чыстай пітной вадой на 100 %. За апошнія гады быў рэалізаваны шэраг мерапрыемстваў для павышэння яе якасці, у ліку нядаўніх – запуск у мінулым годзе станцыі абезжалезвання ў вёсцы Сачыўляны і дзвюх міні-станцый у Хадзяўлянах і Ахонаве. Сёлета будзе ўстаноўлена апошняя з неабходных на Дзятлаўшчыне станцый абезжалезвання ў Нянадавічах, такім чынам уся пітная вада ў раёне будзе адпавядаць дапушчальнаму ўзроўню ўтрымання жалеза. Падрыхтоўчыя работы для рэалізацыі праекта ўжо праведзены, устаноўлены павільёны для мантажу абсталявання і знойдзены падрадчык – ТАА “Тэрва”.
– Чым будзеце здзіўляць землякоў у Год добраўпарадкавання?
– Мяркую, дзятлаўчане і госці нашага раёна заўважылі, як з кожным годам ён мяняецца да лепшага. У мінулым годзе ў Дзятлаве з’явіліся прыгожыя святлодыёдныя кансолі па вуліцах Міцкевіча, Савецкай, Чырвонаармейскай. Сёлета закупаем новыя, якія будуць усталяваны на вуліцах горада. Летам у райцэнтры, акрамя трох плаваючых, будуць функцыянаваць два новыя фантаны: адзін у выглядзе чашы – у скверы Дварчаніна (земляныя работы на аб’екце ўжо распачаты), другі – пешаходны ў раёне плошчы 17 Верасня, непадалёку ад будынка былога Дома быту. Абодва яны будуць мець падсветку, таму плануецца закладка для гэтай мэты электрычных сетак і каналізацыі. На гэтыя два аб’екты было выдзелена 200 тысяч рублёў з раённага бюджэту. Каб дзятлаўчане атрымлівалі асалоду ад пешых прагулак, у планавым парадку будзем прадаўжаць мяняць тратуарнае пакрыццё на вуліцах горада.
– На якой стадыі рамонт лазні ў Дзятлаве?
– Асноўны аб’ём будаўніча-мантажных работ па першым пускавым комплексе выкананы больш чым напалову, цяпер вядзецца аддзелка ўнутраных памяшканняў пліткай з наступным добраўпарадкаваннем прылеглай да будынка тэрыторыі. У ліпені плануем завяршыць рамонт лазні, каб адразу пасля атрымання фінансавання прыступіць да другога пускавога комплексу – рамонту басейна.
– Ці папоўніцца сёлета фонд арэнднага жылля?
– Так, у гэтым годзе будзе праведзена рэканструкцыя нежылога будынка плошчай больш за 700 квадратных метраў па вуліцы Дзятлаўскай, 2 у Наваельні, дзе будуць створаны 14 арэндных кватэр ведамаснага падпарадкавання. У той жа час, юрыдычная служба Дзятлаўскага РУП ЖКГ рыхтуе дакументы на продаж незаселеных арэндных памяшканняў, якія знаходзяцца, больш падрабязная інфармацыя аб гэтым будзе апублікавана ў сродках масавай інфармацыі.
– Якія праекты рэалізуюцца ў супрацоўніцтве дзятлаўчан з камунальнымі службамі раёна?
– У 2024 годзе сіламі РУП ЖКГ заменены ўчастак водаправода па вуліцы Леніна ў Дзятлаве. Ужо распрацавана праектна-каштарысная дакументацыя па пракладванні каналізацыі па вуліцах Гагарына і Катоўскага. Таксама пачалі падрыхтоўчыя работы для праектавання па стварэнні водаправоднай сеткі па вуліцы Катоўскага для кааператыву “Жамчужная вада”, які аб’яднаў 16 спажыўцоў горада Дзятлава.
– Што пажадаеце калегам з нагоды свята?
– Выкананне ўсіх пастаўленых задач – заслуга нашага дружнага, працавітага, прафесійнага і адказнага калектыву. Думаю, дзятлаўчане бачаць, што сіламі камунальнай службы раёна Дзятлаўшчына прыгажэе з кожным годам, і гэта тэндэнцыя будзе прадоўжана. Хачу выказаць усім работнікам камунальнай службы словы ўдзячнасці, пажадаць, каб землякі ацанілі іх старанні па заслугах. Ад усяго сэрца жадаю стабільнасці, працвітання, поспехаў ва ўсіх справах. Няхай у сем’ях пануюць дабрабыт, любоў, а над галавой будзе мірнае неба.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#ЖКХ #Дятловщина #нашалепшае #нашелучшее
