На Дзятлаўшчыне прайшлі раённыя спаборніцтвы па валейболе сярод супрацоўнікаў сілавых структур на прызы раённага камітэта ГА “БРСМ”.
Як расказала першы сакратар гэтай моладзевай арганізацыі Кацярына Хілімончык, традыцыйныя валейбольныя спаборніцтвы праходзілі ў памяць пра земляка Івана Талерчыка – міліцыянера, які загінуў пры выкананні службовых абавязкаў, і былі прымеркаваны да Дня абаронцаў Айчыны і Узброеных Сіл Рэспублікі Беларусь.
Прайшлі сёлетнія спартыўныя баталіі на базе гімназіі № 1 горада Дзятлава. На валейбольную пляцоўку выйшлі чатыры каманды супрацоўнікаў сілавых структур.
Перад пачаткам гульні моладзевы лідар раёна павіншавала валейбалістаў з надыходзячым святам, пажадала не толькі спартыўных, але і працоўных перамог, моцнага здароўя, шчасця, дабрабыту і годнай службы на карысць раёна і Айчыны.
Барацьба на валейбольнай пляцоўцы праходзіла вельмі напружана, асабліва сярод прэтэндэнтаў на другое месца, бо лідарства ў турніры з самага яго пачатку ўзяла каманда раённага аддзела па надзвычайных сітуацыях. Пасля цікавай і актыўнай гульні нарэшце вызначыліся ўсе месцы ў турнірнай табліцы.
Абсалютнымі пераможцамі і ўладальнікамі кубка турніру аказаліся ратаўнікі. Заслужаную сярэбраную перамогу заваявалі супрацоўнікі папраўчай калоніі-пасялення № 26 аграгарадка Гезгалы. Трэцяе месца з аднолькавай колькасцю турнірных ачкоў паміж сабой падзялілі каманды супрацоўнікаў аддзела ўнутраных спраў райвыканкама і Дзятлаўскага раённага аддзела Дэпартамента аховы.
Кацярына Хілімончык уручыла камандам адпаведныя ўзнагароды і памятныя падарункі ад раённай моладзевай арганізацыі.
Ірына СТЫРНІК
Фотаздымкі прадастаўлены арганізатарамі спаборніцтваў
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#спорт #волейбол
