У СГФ “АграМілк” кіпіць уборка кукурузы

Аграрыі сельскагаспадарчага філіяла актыўнымі тэмпамі набліжаюцца да фінішу ўборкі гэтай культуры на сілас і да экватара ўборкі на зерне.

Аб тым, як ідзе працэс, расказаў галоўны аграном СГФ “АграМілк” Андрэй Лежань:

– На сёння ўбралі 719 гектараў кукурузы  на сілас, што складае 81 % ад плошчы пасеянага, валавы збор – 15 021 тона. На зерне ўбрана 192 гектары (48 %) пры ўраджайнасці 100 цэнтнераў з гектара. Валавы збор склаў 1920 тон.

Ва ўрочышчы Загуменне Засецце працуюць два здрабняльныя комплексы “Джон Дзір” і “КВК-800”, на адвозцы – дзесяць адзінак тэхнікі: па пяць трактароў і МАЗаў.

Працэс ідзе без перапынкаў, надвор’е спрыяе плённай рабоце, таму і настрой у аграрыяў выдатны.

– Стараемся ўсё ўпарадкаваць, пакуль суха і не холадна. Сёння тэхніка ідзе лёгка, працуецца з задавальненнем, – расказвае трактарыст-машыніст Сяргей Пашукевіч. – З пачатку года працаваў на трактары “МТЗ-82” на ўнясенні арганічных угнаенняў, усё лета правёў за рулём камбайна “Джон Дзір” на падборы траў, а цяпер на ім жа ўбіраю кукурузу.  Работа ладзіцца, кормяць добра, прывозяць на месца. Люблю працаваць у полі: адчуваецца маштаб, веліч, ды і ўраджай кукурузы сёлета радуе.

Свята работнікаў сельскай гаспадаркі і перапрацоўчай прамысловасці, якое не за гарамі, Сяргей Якаўлевіч традыцыйна сустрэне з сям’ёй. Ён віншуе ўсіх аграрыяў з гэтай нагодай, жадае ўсяго найлепшага і спадзяецца, што начальства адзначыць калектыў святочнай прэміяй.

Уладзімір Лайло – адзін з самых вопытных механізатараў філіяла, ужо 40 гадоў ён у сельскай гаспадарцы. За рулём сучаснага трактара “МТЗ-1523” працуе пяты год, выконвае ўсе віды работ: ад ворыва і падрыхтоўкі глебы пад сяўбу – да перавозкі ўраджаю, чым займаецца і цяпер.

– Я вырас у вёсцы, іншай работы для сябе ніколі не жадаў, – дзеліцца мужчына. – Дзе нарадзіўся, там і спатрэбіўся. Працаваць добра: тэхніка за дзесяцігоддзі стала больш магутнай і зручнай, а на малой радзіме зямля сама дапамагае.

Ён далучаецца да віншавання калег з надыходзячым святам:

– Жадаю, каб было ва ўсіх моцнае здароўе, усё астатняе заробім. Каб наша работа заўсёды цанілася і дастойна аплачвалася, а ўраджаі з кожным годам раслі.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае