Дабрачынная святочная акцыя пад такой назвай штогод праходзіць на Дзятлаўшчыне, каб падарыць навагоднюю радасць і добры настрой дзецям з асаблівасцямі псіхафізічнага развіцця і тым хлопчыкам і дзяўчынкам, якія гадуюцца ў шматдзетных і апякунскіх сем’ях раёна.
З падарункамі і цёплымі віншаваннямі на іх адрасы прыходзяць лідары і актывісты “Белай Русі”.
29 снежня намеснік старшыні райвыканкама, дэпутат раённага Савета дэпутатаў, старшыня раённай арганізацыі РГА “Белая Русь” Вадзім Бялятка разам з намеснікам па аб’яднанні – начальнікам аддзела ідэалагічнай работы і па справах моладзі райвыканкама Вольгай Рагачовай накіраваліся ў Міроўшчыну. Тут у апякунскай сям’і сваёй бабулі Святланы Віктараўны жыве асаблівы юнак – Уладзіслаў Кветка, навучэнец Мірскага каледжа.
Ад раённай арганізацыі “Белая Русь” і раённага выканаўчага камітэта Вадзім Бялятка павіншаваў Уладзіслава з Новым годам і Калядамі:
– Спадзяёмся, што карысны падарунак ад грамадскага аб’яднання кожны раз будзе ўзнімаць табе настрой. Ну і якое ж свята без цукерак! Жадаем табе поспехаў і старання ў вучобе, здароўя, спаўнення жаданняў, каб у вашым доме панавалі шчасце, дабрабыт і радасць.
– Няхай Новы год прынясе шмат новых планаў, цікавых падзей, добрых сустрэч, – далучылася да пажаданняў Вольга Рагачова.
Уладзіслаў і Святлана Віктараўна таксама павіншавалі гасцей са святамі і падзякавалі за прыемны візіт і падарункі.
Святочная акцыя “У Новы год – з “Белай Руссю” прадаўжае крочыць па Дзятлаўшчыне, да яе далучаюцца актывісты пярвічак раёна, якія з падарункамі наведваюць шматдзетныя сем’і, дзе гадуюцца пяцёра і болей дзяцей. Кожны такі юны дзятлаўчанін атрымае цёплыя віншаванні і прыемныя сюрпрызы ад РГА “Белая Русь”.
Ірына СТЫРНІК
Фота аўтара і арганізатараў акцыі
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
