Дырэктарам камунальнага сельскагаспадарчага ўнітарнага прадпрыемства “Жукоўшчына” назначаны Мікалай Шых.
Старшыня райвыканкама Андрэй Садоўскі прадставіў калектыву новага кіраўніка.
– Мікалай Уладзіміравіч – чалавек вопытны ў сваёй сферы. Працуючы ў сельгаспрадпрыемствах, упраўленні сельскай гаспадаркі і харчавання райвыканкама, ён паказаў сябе граматным, запатрабаваным спецыялістам, які, упэўнены, на новай пасадзе прыменіць свае веды і вопыт належным чынам, – адзначыў Андрэй Уладзіміравіч. – Жадаю вам удачы, каб усё задуманае атрымалася пры падтрымцы спецыялістаў, якія стануць з вамі адной камандай. Наладзіць стабільную эфектыўную работу сельгаспрадпрыемству дапаможа дзяржаўная падтрымка. Акрамя тыпавых выплат да закупачных цэн, будзе выдзелена каля 560 тысяч рублёў з раённага бюджэту, 300 тысяч рублёў на паліва і столькі ж – на закупку мінеральных угнаенняў. Пры гэтым задача перад усім калектывам стаіць надзвычай адказная: вывесці прадпрыемства на стабільную прыбытковую дзейнасць за кошт павелічэння надояў, выканання рэгламентаў у раслінаводстве і гаспадарскага падыходу. Як і ў любой сферы, кожны спецыяліст павінен прыносіць карысць, быць прыкладам для калег, тады і вынік не прымусіць сябе чакаць. Са свайго боку, мы робім усё магчымае, каб вас падтрымаць – тэхнікай, фінансамі, добрай парадай, але і ад вас чакаем актыўных дзеянняў.
Да словаў старшыні райвыканкама далучыўся яго першы намеснік – начальнік упраўлення сельскай гаспадаркі і харчавання райвыканкама Віталій Шулейка:
– Мікалай Шых для мяне – старэйшы таварыш, настаўнік, вопытны аграном, патрэбны нашаму ўпраўленню. Аднак КСУП “Жукоўшчына” сёння неабходны добры кіраўнік. Дзякуй Мікалаю Уладзіміравічу, што пагадзіўся ўзначаліць гэты вялікі калектыў. Cельгаспрадпрыемства мае ўсе рэсурсы для росту і развіцця – матэрыяльную базу, вопытных спецыялістаў, фінансавую падтрымку ад дзяржавы. Справа за малым: настроіцца на актыўны лад і дасягнуць пастаўленых мэтаў.
Таксама новы кіраўнік прымаў віншаванні з назначэннем ад адміністрацыі КСУП “Жукоўшчына”. Мікалай Шых выказаў спадзяванне на плённае ўзаемадзеянне і камандную работу.
************
Мікалай Уладзіміравіч Шых нарадзіўся 25 кастрычніка 1964 года ў вёсцы Прадзелкі Слонімскага раёна. У 1993 годзе скончыў Гродзенскі сельскагаспадарчы інстытут па спецыяльнасці “аграномія”, у 2012 годзе – Акадэмію кіравання пры Прэзідэнце Рэспублікі Беларусь па спецыяльнасці “дзяржаўнае і мясцовае кіраванне”.
Пачынаў працоўную дзейнасць у 1986 годзе брыгадзірам у саўгасе “Сасноўка” Слонімскага раёна, быў аграномам-агароднінаводам РБП № 10 горада Дзятлава.
З 1996 па 2005 гады – загадчык участка, галоўны аграном, намеснік старшыні сельгаскааператыву “Багатая ніва” (у мінулым – сельскагаспадарчага таварыства “Ніва”) Дзятлаўскага раёна. У 2005-2006 гадах з’яўляўся яго кіраўніком.
У 2006-2009 гадах быў намеснікам старшыні па кормавытворчасці, намеснікам па ідэалогіі СВК “Русь-Агра”.
У 2009-2010 гадах – дырэктар Слонімскага раённага ўнітарнага сельскагаспадарчага прадпрыемства “Пераможца”.
У 2010-2013 гадах працаваў першым намеснікам старшыні – начальнікам упраўлення сельскай гаспадаркі і харчавання Слонімскага райвыканкама; з 2013 па 2017 гады – намеснікам начальніка аддзела арганізацыі вытворчасці – галоўным аграномам упраўлення; у 2017-2018 гадах – намеснікам начальніка ўпраўлення.
З 2018 па 2020 гады быў загадчыкам вучэбнай гаспадаркі Жыровіцкага сельскагаспадарчага каледжа.
У 2020-2021 гадах займаў пасаду выканаўчага дырэктара КСУП “Дзераўноўскі” Слонімскага раёна.
З 2021 года да цяперашняга часу Мікалай Уладзіміравіч працаваў намеснікам начальніка аддзела арганізацыі вытворчасці ўпраўлення сельскай гаспадаркі і харчавання Дзятлаўскага райвыканкама.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
