Тэма 500-годдзя беларускага кнігадрукавання — дамінантная ў экспазіцыі Беларусі на выстаўцы ў Парыжы

Дамінантнай тэмай нацыянальнай экспазіцыі Беларусі на Парыжскай кніжнай выстаўцы, што праходзіць з 24 па 27 сакавіка, стала 500-годдзе беларускага кнігадрукавання, паведамілі БЕЛТА ў Міністэрстве інфармацыі Беларусі.

Наведвальнікам выстаўкі прадстаўлены шэраг выданняў, выдадзеных да гэтай знакавай даты: “Франциск Скорина – человек мира”, “Францыск Скарына. Са слаўнага горада Полацка”, “Шляхамі Францыска Скарыны”, “Францыск Скарына. Маем найбольшае самі”, “Асветнікі Беларусі. Ефрасіння Полацкая. Кірыла Тураўскі. Францыск Скарына”, дзіцячая энцыклапедыя “Францыск Скарына” ў трох кнігах “Чалавек-энцыклапедыя”, “Чалавек свету”, “Чалавек-легенда” і многія іншыя. Прэзентавана факсімільнае 20-томнае выданне “Кніжная спадчына Францыска Скарыны”.

Дэлегацыя беларускіх кнігавыдаўцоў не толькі прэзентуе новыя кнігі наведвальнікам Парыжскай кніжнай выстаўкі, але і перадасць выданні Інстытуту ўсходніх моў і культуры. Бязвыплатная перадача беларускіх кніг з’яўляецца адным з мерапрыемстваў падпраграмы “Беларусы ў свеце” дзяржпраграмы “Культура Беларусі”.

БелТА.