У рамках Тыдня бацькоўскай любові ў Гродне прайшоў урачысты прыём старшыні аблвыканкама Уладзіміра Караніка для бацькоў Прынёмання.
Запрашэнні на ўрачыстасць атрымалі 19 сем’яў з розных раёнаў Гродзеншчыны – гэта шматдзетныя маці, пераможцы сямейных конкурсаў, бацькі, чые дзеці дасягнулі значных поспехаў у розных сферах – навуцы, мастацтве, спорце, працоўнай дзейнасці.
Сярод удзельнікаў прыёму губернатара былі нашы землякі – сям’я Урбанаў. Святлана Уладзіміраўна працуе настаўніцай у сярэдняй школе № 3 горада Дзятлава імя І. Ю. Філідовіча, разам са сваімі вучнямі неаднаразова станавілася пераможцай конкурсаў даследчых і творчых работ, Алег Віктаравіч – вадзіцель. Урбаны гадуюць дваіх дзяцей. Імя іх старэйшага сына Яраслава, які вучыцца ў 11 класе, занесена ў спецыяльны фонд Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў. Дачка Улада – дзевяцікласніца, яна спартсменка, пераможца літаратурных конкурсаў рознага ўзроўню.
Урбаны падзяліліся ўражаннямі ад урачыстасці:
– Прызнацца, не чакалі такога маштабнага прыёму. Для нас была падрыхтавана цікавая канцэртная праграма, святочны стол, у фармаце фотапрэзентацый аб кожнай сям’і адбылося знаёмства. Вельмі рады, што трапілі на свята, мяркуем, што “пропускам” на яго сталі заслугі нашых дзяцей, у першую чаргу Яраслава, якім вельмі ганарымся. Шчыра ўдзячны Уладзіміру Караніку, паколькі сёння вельмі важна адчуваць падтрымку дзяржавы не толькі для шматдзетных сем’яў, але і тых, дзе гадуюцца паспяховыя дзеці, разумець падтрымку інстытута сям’і. Мы не шматдзетныя, і для нас гэта была ўнікальная магчымасць. Прыемна было пабачыць шчаслівыя сем’і Гродзеншчыны: на прыёме былі залатыя юбіляры, якія пранеслі сваё каханне і сямейны саюз праз многія дзесяцігоддзі і натхняюць іншых сваім ладам жыцця. Мы пазнаёміліся і з сямейнымі дынастыямі педагогаў, дактароў, прадстаўнікоў іншых прафесій. Сустрэча сапраўды атрымалася вельмі цёплай, панавала ўтульная камерная атмасфера, дзе ў нефармальнай абстаноўцы была магчымасць пагутарыць з прадстаўнікамі ўлады, адчуць падтрымку дзяржавы. Свята пакінула толькі станоўчыя эмоцыі, мы абмяняліся нумарамі тэлефонаў, віншаваннямі.
Ірына СТЫРНІК
Фотаздымкі ўдзельнікаў урачыстасці
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
