На Дзятлаўшчыне прайшоў раённы тэматычны тыдзень “Я – грамадзянін краіны Піянерыя!”, прысвечаны дню нараджэння грамадскага аб’яднання “БРПА”.
Стартаваў тыдзень урачыстымі лінейкамі, якія праходзілі ва ўстановах адукацыі нашага раёна. Акрамя таго, былі праведзены раённая гульня “Форд — Піянер”, прысвечаная дню нараджэння ГА “БРПА”, адзіная раённая класная гадзіна “Сустрэча пакаленняў” з удзелам ветэранаў піянерскага і камсамольскага руху, рэкламна-агітацыйныя акцыі аб дзейнасці піянерскіх дружын, музычныя перапынкі, конкурс эсэ “Патрыятызм у маім разуменні”.
Фінішаваў тэматычны тыдзень раённай інтэлектуальна-пазнавальнай гульнёй “Зорны час: падарожжа ў краіну Піянерыя”. Удзел у ёй прынялі старшыні саветаў піянерскіх дружын установаў адукацыі раёна, сакратары пярвічных арганізацый ГА “БРСМ”.
Удзельнікі гульні падзяліліся на дзве каманды — “Лідары” і “Даследчыкі” — і прайшлі чатыры раўнды. Ім давялося прадэманстраваць свае веды па гісторыі піянерскага руху, пачынаючы з 20-х гадоў мінулага стагоддзя па цяперашні час.
Выступленні каманд ацэньвалі эксперты: педагог-арганізатар Вензавецкага дзіцячага сада-сярэдняй школы Аксана Віктараўна Роўба, педагог-арганізатар Казлоўшчынскай сярэдняй школы Наталля Мікалаеўна Каўцэвіч, ветэран камсамольскага і піянерскага руху Валянціна Іванаўна Скок. За актыўны ўдзел і веды па гісторыі піянерскага руху навучэнцы атрымалі ад экспертаў граматы раённага савета ГА “БРПА”. Фінальным акордам сустрэчы стаў запуск паветранага змея.
Бліц-апытанне, праведзенае сярод удзельнікаў мерапрыемства, паказала, што слова “піянер” у наш час, як і 95 гадоў таму, гучыць горда.
І. МІШЧАНКА,
старшыня раённага савета ГА “БРПА”, метадыст Цэнтра творчасці дзяцей і моладзі горада Дзятлава
