У рамках электаральнай кампаніі па выбарах Прэзідэнта Рэспублікі Беларусь з работнікамі сфераў культуры, спорту, турызму і калектывам Дзятлаўскага філіяла ААТ “Молочный Мир” сустрэўся дэпутат Палаты прадстаўнікоў Нацыянальнага сходу Рэспублікі Беларусь Міхаіл Орда.
У саставе інфармацыйнай групы таксама былі намеснік старшыні райвыканкама Вадзім Бялятка, начальнік аддзела ідэалагічнай работы і па справах моладзі райвыканкама Вольга Рагачова.
– Падобныя сустрэчы неабходны, каб атрымліваць аб’ектыўную актуальную інфармацыю, – выказаў упэўненасць Міхаіл Орда. – Для любой дзяржавы выбары – складаны працэс, у якім задзейнічана шмат людзей, структур, рэсурсаў. Наша краіна прэзідэнцкая, такіх большасць па форме праўлення, і нам належыць выбраць кіраўніка дзяржавы – чалавека, які адказвае за Канстытуцыю, яе выкананне, цэласнасць, бяспеку, стабільнасць – адным словам, за асноўныя гарантыі.
Цяпер беларусы выбіраюць сваю будучыню на наступныя пяць гадоў, мы вызначаем, як будзем жыць, што будзе захавана, а што скасавана. Што на самой справе важна для людзей і народа? Каб быў дах над галавой, сям’я накормлена, апранута, мелася магчымасць атрымаць адукацыю, медыцынскую дапамогу, каб людзі разлічвалі на бяспеку і мірнае існаванне. І ўсё гэта – нашы з вамі “заваяванні” за трыццаць гадоў незалежнасці. Возьмем, напрыклад, сферу сельскай гаспадаркі, а Беларусь краіна рызыкоўнага земляробства, калі ў 2000-х мы назапашвалі 4-4,5 мільёна тон зерневых, то сёння – гэта 9 мільёнаў, а па вытворчасці малака мы на чацвёртай пазіцыі ў свеце. У тры разы больш за ўласныя патрэбы Беларусь вырабляе прадуктаў, поўнасцю задавольвае харчовую бяспеку і яшчэ рэалізоўвае на 8 мільярдаў долараў ЗША сельгаспрадукцыі. Актыўна, практычна па 6 мільёнаў квадратных метраў штогод, здаецца ў эксплуатацыю жыллё.
Беларусам даступна бясплатная медыцына, даціруюцца камунальныя паслугі, сур’ёзная база створана ў энергетыцы, ІТ-сферы, прамысловасці. Па эканамічным развіцці Беларусь падышла да шостага ўкладу развіцця эканомікі: мае гістарычны шанц вырвацца з ліку краін сярэдняга ўзроўню развіцця на больш высокі этап.
На выбарчым заканадаўстве, ходзе і этапах электаральнай кампаніі больш падрабязна спынілася Вольга Рагачова.
Аб развіцці раёна, аб тым, чым сёння ганарыцца Дзятлаўшчына, расказаў Вадзім Бялятка.
Удзельнікі інфармацыйнай сустрэчы пацікавіліся таксама, ці хутка ў Дзятлаве адкрыецца басейн.
Ім расказалі, што вясной мяркуецца здаць першую чаргу будаўніцтва – лазню, крыху пазней – басейн. Комплекс будзе на балансе сектара спорту і турызму. На яго базе плануюцца не толькі лазня і басейн, але і трэнажорная зала.
З працоўнымі калектывамі Дзятлаўшчыны таксама сустракаліся старшыня раённага Савета дэпутатаў Аляксандр Бараноўскі, намеснікі старшыні райвыканкама Вольга Жэлезоўская, Вадзім Бялятка, дэпутат абласнога Савета дэпутатаў Віктар Адамчык.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Президент #Выборы
